Мордовиянь Прявтось тешкстызе: те кенярксчинть юрсо ашти патриотизмась ды раськенть вейсэндявомась. 1612 иень ополчениясонть ульнесть рузт, эрзят, мокшот, татарт ды ламо лия раськеть. Сынст патриотизмась - течинь поколениянть туртов невтема. «Минь кирдтянок мельсэнек Мининэнь ды Пожарскиень прявтсо раськень ополчениянь подвигенть. Васоло 1612 иень тевтне невтизь, кода эрьва кодамо раськень ды пазнэнь кемемань ломантне вейсэндявозь аштесть ятонть каршо, мезесь алкукс идизе минек масторонть чивалгома ёнксонь каявомадонть, зярдо яттнэ саиксэлизь минек государственностенть. Течи кенярксчись саи башка смусть минек туртов. Эряви цидярдомс ды изнямс, минек историянь ундокстнэнь, минек культуранть ды койтнень лангс нежедезь», - мерсь Артём Здунов.
Ней масторось вейсэндявсь вейсэнь бажамонть - фронтонтень лездамонть коряс. «Мон ёвтан сюкпря весенень, кие ней виевстэ тюри передовойсэ, кие лезды минек боецтнэнень специальной военной операциянть шкасто, минек границянь регионтнэнень - весенень, кие теи путовкс минек Изнямонтень!» - тешкстызе региононь руководителесь.
Сюкпрянь башка валт республикань Прявтось ёвтась сеттненень, кить ветить од ломантнень марто патриотической тевдееманть, лездыть историянь тевтнень реставрациясонть, кирдить мельсэ ледстнематнень, якить мемориалтнэнь мельга ды панжить од кеврунгот, ветить историянь урокт. «Сюкпря весенень тынк виде важодеманть, масторонть ды минек республиканть эрямосо ёроков улеманть кисэ. Арсян тенк кеме шумбрачи, паро эрямо, од изнявкст. Кадык вейсэндявомась свал моли минек Россиянть ды минек республиканть марто!» - мерсь Артём Здунов.
Раськетнень вейсэндявомань чинть кувалма поздоровт истя жо ёвтасть МР-нь Госсобраниянь Председателесь Владимир Чибиркин ды МР-нь Правительствань Председателесь Батыр Эмеев.
Казнеть явшезь эрьва кодамо профессиянь представительтненень. РФ-нь Президентэнть указонзо коряс воинской долгонть топавтомсто невтезь мужестванть, отваганть ды а пелемачинть кисэ Мужествань орденсэ казезь боевой тевдеематнень ветеранось, специальной военной операциянь участникесь Дмитрий Глазков. Истя жо сонензэ максозь «За храбрость» II степенень медаль. Истямосо жо казезь боевой тевдеемань ветеранось, специальной военной операциянь участникесь Сергей Володин. «За отвагу» медальсэ казезь боевой тевдеематнень ветеранось, специальной военной операциянь участникесь Владислав Федькин.
«За заслуги перед Отечеством» орденэнь II степенень медальсэ казезь «Биохимик» АО-нь инвестициянь виевгавтомань коряс прявтось Татьяна Лысова ды Весероссиянь а неицятнень обществань инвалидтнэнь Мордовия республикань общественной организациянь председателесь Марина Пуряева.
МР-нь Прявтонть указонзо коряс машиностроениянь коряс покш изнявкстнэнь кисэ Мордовия Республикань Славань I степенень орденсэ казезь «Мордовское Агротехническое Машиностроение» АО-нь управляющей прявтось Геннадий Громов. Мордовия Республикань Славань орденэнь пешксе Кавалерэнть лемс гайгсь МР-нь Государственной гимнась.
Мордовиянь зярыя эрицятненень максозь «Лауреат премии Главы Республики Мордовия «Национальное достояние» лемесь. Казезтнень ютксо - «Юлдаш» газетань прявт редакторось Камиль Тангалычев, Покш Березникень «Теремок» эйдень кужонь 1-це № эйдень кужонь воспитателесь Ольга Маркина, Н. П. Огарёв лемсэ МГУ-нь национальной культурань институтонь СПО-нь отделениянь концертмейстерэсь Василий Родионов, МР-нь Народной артистэсь Николай Большаков, Покш Березникень енксонь «Память» вешнемань отрядонь ветицясь Сергей Косынкин, Лямбирень енксонь Покш Елховкань школань тонавтыцясь Тамара Разумова.
Весе казезтнень вейсэнди эсь тевентень, эсь модантень ды эсь семиянтень вечкемась. Дивавтыця ломанть!
«Минек семиясо ниле эйкакшт - мирдем Юрий Михайлович марто кастынек колмо тейтерькат ды цёра, - ёвтнесь журналисттнэнень эйдень кужонь воспитателесь Ольга Маркина. - Минь мартонзо касынек ламо эйкакшонь триця семиятнесэ. Весе ояксчисэ эрицят - пандокс аштить вейке-вейкень кисэ! Покш семиянь койтнень пачтятано эсенек эйкакштненень. Покш тейтеренек туртов 29 иеть, мирдензэ марто сынст ниле цёраст! Ансяк тейтерькаяк эряви! Мон важодян эйдень кужосо, тонавтан вишкинетнень чевтечинтень, видечинтень, Тиринь ёнксонтень ды Россиянтень вечкемантень!»
Мордовия Республикань Прявтонь Пресс-службась