Арсеви, Саранскоев сыть малав 100 участникть ды экспертэнь вейсэндявксонь представительть евразиянь пространствань мастортнэстэ. Омбо масторонь 200 ламо пелькстыцятне ды эксперттнэ кармить улеме чемпионатсонть ве ендо ды топавтомо заданиятнень.
«Течи ули кемема, Нацфиналось Саранскойсэ ютавтови вадрясто – кода Агентствась, истя жо Мордовия Республикась теить тень туртов весе эрявиксэнть. Тедеде первенстванть лувсо минь ютавтано Евразийской чемпионат, конасонть Россиянь профессиональной ерокчинь коряс Национальной сборноентень совицятне ды 8 мастортнэстэ малав 300 пелькстыцятне невтсызь ерокчист 29 компетенциятнень коряс. Кодамояк изоляциядо, истя жо технологиянь ды кадрань, минь течи а кортатано: минек масторонть улить кадратнень анокстамонь ды чемпионаттнэнь ютавтомань эсензэ методиканзо, конатненень явить мель лия государстватне. Минь панжадотано раськеютконь вейсэндявксонть марто вейсэнь важодемантень ды эсенек пельде аноктано сонзэ поладомс», – яволявтсь «Агентство развития профессионального мастерства (Ворлдскиллс Россия)» АНО-нь генеральной прявтось Роберт Уразов.
Евразийской чемпионатонь весе участниктненень максовить скиллс-паспортт.
«Ворлдскиллс Россия пелькстамотнень уш ули ютавтомань башка енксост: минь содатано, важодемань кодат профессият анокстамс, кона отраслятненень эрявить профессиональной неть кадратне, кодамо оборудования нолдамс тевс, – мерсь Мордовия Республикань Прявтось Артём Здунов. – Минь уш вадрясто чарькодтяно, кодамо мероприятия карматано ютавтомо таштамковсто. Меельце ковтнестэ тевтне, нама, полавтовсть пачтицятнень (поставщиктнень), вешематнень коряс. Ансяк участниктнень прявт составось эзь полавтово – ансяк седеяк ламолгадсь, вейсэндявсть омбо мастортнэ. Мордовиянть туртов те покш честь – ютавтомс Национальной чемпионатонь финал. Кеман, минь ютавтсынек сонзэ пек вадрясто».
Эксперттнэнь, производствань тонавтомань мастертнэнь ды преподавательтнень пелькстамотнеде башка учи профессиональной ды методической тонавтомань коряс покш пелькс.
Анокстыцятнень яволявтомаст коряс, Нацфиналонть лувсо Н.П.Огарев лемсэ МГУ-нть юрсо Россиянь Ворлдскиллсэнь участниктне евтнить отечественной движениянь 10 иетнень историянть перть топавтозь важодемань прявт цетавкстнэде.
Прявт тевекс карми пленарной промксось. Сон ютавтови Нацфиналонь прявт площадкасонть – «Саранск-Аренасо». Программантень совавтозь тонавтомань интенсивть ды деловой налксема, движениянь активисттнэнь, спонсортнэнь ды партнертнэнь проекттнэде, тевдеемань топавтозь енкстнэде, региононь практикатнеде, изнявкстнэде евтнематне. Мероприятиянь башка пельксэсь алтави СПО-нь тонавтомань сехте вадря организациятнень ды юниортнэнь каземантень.
Деловой программань спикерэкс кармить эксперттнэ, общественной мельтнень-арсематнень лидертнэ, масторонь сехте покш компаниятнень, стейкхолдертнэнь, тонавтомань организациятнень, регионтнэнь координационной куншкакуротнень, Ворлдскиллс Россия агентствань, исполнительной властень органтнэнь, Национальной сборноень ды икеле иетнестэ профессиональной ерокчинь коряс чемпионатнэнь конкурсанттнэ.
Теде башка, Мордовия Республикань 5-11-це класстнэсэ тонавтницятнень туртов тееви профориентациянь тарка.
Тедеде «Молодые профессионалы» (WorldSkills Russia) – 2022 Национальной Х чемпионатонь финалось, конасонть кармить пелькстамо профессиональной учреждениянь студенттнэ (16-25 иесэ) ды 16 иеде седе од ломантне, ютавтови таштамковонь 8-12-це читнестэ «Саранск-Арена» спортонь комплекссэнть дистанционно-очной лувсо.
Первенствантень пурнавить 310 седе ламо од профессионалт, конат невтьсызь ерокчист пелькстамонь 25 компетенциятнень лувсо. Сынст важодемантень питне максыть малав 170 экспертт. Малав 720 конкурсантт вейсэндявить пелькстамотнес ве ендо ды кармить невтеме ерокчист 41 профессиональной енксонть коряс. Сынь топавтсызь заданиятнень эсест организациятнесэ видеофиксациянть коряс. Сынст важодемаст мельга онлайн лувсо кармить ваномо 1 тежадо ламо экспертт.
66 компетенциятне невтевить 7 енкстнэсэ: строительствась ды строямонь технологиятне; информационной ды коммуникационной технологиятне; шкинемась ды дизайнась; производствась ды инженерэнь технологиятне; услугатнень сферась; транспортось ды логистикась; тонавтомась.
Прявт пелькстамотнеде икеле ютавтови Эксперттнэнь чемпионатось.
«Молодые профессионалы» (WorldSkills Russia) Национальной чемпионатонь финалось эрьва ие ютавтови «Образование» нацпроектэнь топавтоманть лувсо. Тедеде первенствань анокстыцятне-ютавтыцятне: Россиянь Федерациянь Просвещениянь министерствась, Мордовия Республикань Правительствась, Профессиональной ерокчинь кастомань-кепетемань агентствась (Ворлдскиллс Россия) ды Стратегической инициативатнень агентствась (АСИ).