Таштамковонь 16-це чистэ Мордовия Республикань Прявтонь тевтнень топавтыцясь Артём Здунов ульнесь «IT-куб» цифровой тонавтнемань центранть панжомасо, конась теезь «Образование» нацпроектэнть лувсо. Иень перть тесэ ютыть тонавтомань малав 400 эйкакшт.
«IT-куб» - дополнительной тонавтомань организация, конась максы содамочить информационной технологиятнень коряс. Тонавтыцятне максыть эйкакштненень содамочить алгоритмикань, мобильной разработкань, робототехникань, Java ды Python вельде программированиянь коряс. Прявт енкстнэнь ютксо кибербезопасностесь ды даннойтнень покш базатнень марто важодемась.
Школасо тонавтницятне уш уставасть эсь проекттнэнь лангсо важодеме. Артём Здунов тешкстызе, эрьва меленть-арсеманть ули практической тевс нолдамозо. "Мон эзинь нее вейкеяк "проект проектэнь кисэ". Тынь кочкиде эрьва кодат енкст - шукшонь пурнамсто саезь космосов ливтямос. Паро, тынь вантадо икелев ды бажатадо теемс ломантнень эрямост седе вадрякс. Бути нейсынек, истят организациятне, кода «IT-куб» эрявить, карматано бажамо панжомс сынст школатнесэ. Тесэ од тонавтыцят - малав весенень 22 иеть. Од специалисттнэнень неень шкань важодемань таркатнень максоманть вельде витевить кадрань кевкстематне", - мерсь Мордовиянь Прявтонь тевтнень топавтыцясь.
Региононь руководителенть туртов ютавтсть экскурсия аудиториятнева. Эрьвасонть - компьютерт, мультимедийной лазт ды проекторт. Эрьва классонть улить рециркуляторт.
Программированиянтень тесэ ушодыть тонавтомо васенце класстонть саезь.
Кибербезопасностень аудиториясонть, тесэ сонзэ лемдить «кибергигиена», тонавтыть интернетсэ сэтьместэ важодемантень.
"Те пек эрявикс дисциплинась. Ней интернетсэ важодемстэ эряви явомс покш мель. Вадря, бути эйкакштне аволь ансяк тонавсызь неть правилатнень, истя жо евтнить эйстэст малавикстнэнень", - тешкстызе Артём Здунов.
Тесэ мастер-класст кармить максомс республикань покш IT-компаниятнень представительтне.
Мордовия Республикань Прявтонь пресс-службась