- Минек ули истямо раське – Россиянь кезэрень раськетнень ютксо вейкесь – мокшэрзянь. Эрзят, мокшот, шокшат... Весе сынь ловить пряст мокшэрзякс. Ды кортыть вейке группань кельсэ. Ансяк сынст кельтне седе пек явовить вейкест вейкест эйстэ, рузонь ды украинань кельтнень коряс. Ансяк сынь покш мель марто ванстыть вейкетьксчист. Мекс? Сынь превейть ды чарькодить, явовомась мезескак парос а вети. Сон лавшомгавты этносонть, – мерсь Путин.
Неть валтнэде мейле Раськень театрань сценанть лангс лиссь Мордовиянь Прявтось Артём Здунов.
«Кельгома ялгат, вечкевикс оят, дорогие друзья! – ушодызе кортамонзо Артём Алексеевич. – Минек масторонь Президенттэнть седе вадрясто а евтат. Течи Россиянь ламот енкстнэсэ тешкстави Эрзянь ды мокшонь чись. Евтан поздоровт ды покш мелень явома минек кезэрень ды тиринь кельтненень – эрзянь ды мокшонь. Сехте прявтось – сеть ломантненень мелень явомась, кить ванстыть ды сюпалгавтыть сынст. Эряви ванстомс минек культурань сюпавчинть, конань эряви пачтямс эйкакштненень-нуцькатненень. Эрьва раськесь ашти колмо нежедькстнэнь лангсо: келенть, конась вейсэнди культуранть ды поэзиянть, раськень ярсамопельтнень ды минек раськень пек мазый оршамопельтнень. Эряви тень ванстомс! Минек аволь шожда шкастонть васенце таркас лиси натой аволь политической, а общественной дипломатиясь. Ламот минек лелятне-ялакстнэ эрить омбо мастортнэсэ, а эряви сеземс сынст марто сюлмотнень, эряви толковамс, ледстнемс седе, кинь кисэ воевасть минек покштятне. Минь ялатеке изнятано. Минь покш мель явтано лия раськетненень. Минь зярдояк а макссынек эсенексенть!»
«Тешксэв, Культурань сюпавчинь иестэнть, конань яволявтызе Россиянь Президентэсь, Мордовиясо кемекстазь раськень культурань ды государственной кельтнень ванстомань ды сюпалгавтомань коряс программа. Сон уш нолдазь тевс, ды минь карматано сонзэ кастомо-виевгавтомо. Мон весемесэ лездан, – мерсь МР-нь Прявтось. – Башка мель явтано раськень-художественной промыслатненень, туристэнь проекттнэнень, книгатнень нолдамонтень. Эряви виевстэ невтемс республиканть. Ванновтон коряс, течи важодемась ветяви пек парсте. Арсян весенень изнявкст! Минь виде кинть лангсо!»
Республикань Прявтось явшесь наградат эрзянь ды мокшонь раськень культурань, кельтнень ды койтнень-кирдатнень ванстоманть кисэ. Ламот тонавтыцятне тешкстазь МР-нь Прявтонь Благодарностьсэ.
Шумбракстнемань вал марто пшкадсь МР-нь Государственной Собраниянь Председателень полавтыцясь Сергей Вдовин. Сон истя жо явшесь казнеть образованиянь важодицятненень.
Течи яволявтозель эрзянь ды мокшонь кельтнень сехте вадря тонавтыцясь. Пелькстамонь финалс лиссть вете тонавтыцят Саранскойстэ ды республикань районтнэстэ. Сехте вадря тонавтыцякс кармась «Тавла» Тонавтомань куншкакуростонть Оксана Трушкова.
Эрзянь ды мокшонь кельтнень весероссиянь чистэнть казезь Эрзянь ды мокшонь кельтнень ды литературань регионъютконь XXIV олимпиадань изницятне, евтазь «Масторава» Регионъютконь фестивалень-пелькстамонь итогтне.
Истя жо Мордовиянь эрицятнень туртов видеонть вельде поздоровт кучсть эрзянь ды мокшонь раськетне, конат эрить Россиянь лия регионтнэсэ.