Ледстясынек, Артём Здунов аравтызе Батыр Эмеевень Саранск ошонь округонь кураторокс, сон важоди китнень строямонь ды витнемань, ошсонть пассажиртнэнь усксемань кевкстематнень коряс.
Ошонь администрациясо неть кевкстематнень кортамосо ульнесть МР-нь Транспортонь ды китнень хозяйствань Государственной комитетэнь председателесь Валерий Кандрин, истя жо муниципальной ды частной перевозчиктнень представительтне.
Батыр Эмеев башка тешкстызе: общественной транспортонь доступностень кевкстемась ашти МР-нь Прявтонть Артём Здуновонь ванновтонзо ало ды веши эрявикс тевтнень куроксто кемекстамонть.
Вице-премьерэсь пачтясь коллегатненень мониторингень невтевкстнэде, конань сон ютавтызе валске час пикень шкасто, ардсь сехте талновтыця маршруттнэнь коряс.
«Евтаса, тевтне пек стакат! Автобустнэ пешксеть, башка оставкатнэсэ ломантне аштить 30-40 минутат, ды бути тенст удалы совамс транспортс, ардомс сави пек стака», – толковизе сон.
Толковизе, течинь чинтень Саранскойсэ 50% пассажиртнэнь ускси «Горэлектротранс» муниципальной предприятиясь, омбоце пельксэнть саить эсест лангс колмо частной компаниятне. Мордовиянь прявтошсо маршруттнэс эрьва чистэ лиснить малав 200 машинат: те покш автобуст, троллейбуст, истя жо маршруткат. Ансяк, кода лангс ливтезель, те а саты. Тевтнень стакалгавты сеяк: машинатне вешить свалшкань питней витнема, транспортонь предприятиятнесэ а сатыть важодицят, пенсионертнэ туить, од ломантне аволь покш мельсэ молить водителекс, сень пингстэ: отраслясонть зарплатась вадря – 100 тежат целковойтнень видьс.
«Ломантне иляст майсе! Минь – эрьвась эсензэ таркасо – аштетяно самай секс, штобу вейсэ витемс неть стакачитнень. Эряви муемс лисема те стака тевстэнть», – тешкстызе Батыр Эмеев.
Кортамось мольсь малав час. Перевозчиктнень ютксто эрьвась яволявтсь покш эскелькстнэнь топавтомань анокчиденть.
«Первая ассоциация транспортных предприятий» прявтось Валентин Копылов евтнесь, сонзэ компаниясь важоди малав весе пригородной маршруттнэнь коряс, истя жо 28№ ды 10№ маршруттнэсэ.
«Час пикстэ, валске ды чокшне минек транспортось карми якамо эрьва 6 минутатнестэ, аволь кода ней 10 минутатень ютазь», – мерсь сон.
Истя жо кармить важодеме лия перевозчиктне. «Пассажирские Перевозки Мордовии» НП-нь прявтось Владислав Кемяшов алтась ламолгавтомс подвижной составонть час пиктнестэ.
«Минь уш одкстомтынек графиктнень. Ламот рейстнэ важодемань чинь лувстонть ютавтозь валскень шкантень. Сехте стака маршруттнэнь коряс минь нолдатано ней техникань аволь 20 единицат, а 26. Те уш максы редявикс цетавкст. Важодемась ули поладозь», – тешкстызе Владислав Кемяшов.
«Горэлектротранс» Саранскоень муниципальной предприятиянь прявтось Борис Боровой тешкстызе, путозь тевесь ули витезь.
«Минь муйтяно кить-янт линиятнесэ машинатнень ламолгавтоманть туртов, карматано важодеме лия графиктнень коряс, пекстамо валскень ды чокшнень час пиктнень, зярдо ошсонть сехте покш трафикесь», – мерсь сон.
Панжиковонь 6-це чинь чокшнестэнть Батыр Эмеев пачтясь ушодозь важодемадонть Артём Здуновнень. Республикань руководителесь мерсь, ошонь округсонть транспортонь доступностень кевкстемась – пек эрявикс.
«Ламо пеняцямот сыть общественной транспортонь важодеманть лангс. Ошонтень те тевесь а топавтови. Эряви лездамс», – мерсь сон.
Транспортниктнень важодемасо васенце вадря цетавкст кармить улеме уш маласо читнестэ.
Батыр Эмеев евтась сюкпря Артём Здуновнень автобустнэнь витнемань коряс кевкстемань витеманть кисэ – уш курок сынь лисить линиятнес.
Ве шкасто правительствась бажи витемс тевтнень водительтнень а сатомаст коряс. Сехте прявтось: транспортонь стакачись сыргавтовсь таркастонзо ды аламо-аламо ули витезь.