«Мордовия Арена» стадионсонть бороцясть Россиянь кавто сехте вадря командатне - «Локомотив-Пенза» ды «Стрела - Ак Барс». Ваныцятне, конатнеде трибунасонть ульнесть 7 тежадо седе ламо ломанть, кирдсть спортсментнэнь весе вийсэст. Виев бороцямосонть изнясь Татарстанонь командась. Изницятненень кубоконть максызь Мордовиянь Прявтось Артём Здунов, РФ-нь Спортонь министрань васенце полавтыцясь Азат Кадыров, Россиянь Регбинь федерациянь президентэсь Игорь Артемьев.
Те чистэнть стадионсонть истя жо тешкстазь вейсэнь тевдеемадо вейсладямо Мордовия Республиканть ды Россиянь Регбинь федерациянть ютксо. Документэнть алов кедьчелькест путызь Мордовиянь Прявтось Артём Здунов ды Федерациянь руководителесь Игорь Артемьев. Вейсладямось аравтозь республикасонть спортонь те видэнь виевгавтоманть ды содавиксэкс тееманть лангс. Мордовиясо важоди Регбинь региононь федерация. Спортонь те видэнть коряс отделениясь панжозь олимпийской резервань комплексной спортивной школанть юрсо. Минек пурназь республикань регбинь команда – сон саи казнень таркат эрьва кодат турниртнэсэ.
Вейсладямонь тешкстамонть марто спортонь те енксонтень максови од эскелькс виевгавтоманть туртов.
Мордовия Республикань Прявтонь пресс-службась