Чадыковонь 13-це чистэ Саранскойсэ ютавтовсь РФ-нь Равчирень федеральной округонь субъекттнэнь государственной властень законодательной органтнэнь Ассоциациянь промксось. Сонзэ важодемасонзо примасть участия ПФО-со РФ-нь Президентэнь полномочной представителесь Игорь Комаров, Мордовия Республикань Прявтонть тевтнень топавтыцясь Артём Здунов, округонь регионтнэнь законодательной органтнэнь руководительтне, властень исполнительной органтнэнь представительтне. Заседаниянь повесткасонть - COVID-19 коронавирусонь инфекциянть седе тов а нолдамось, важодемань производительностень кастоманть коряс мероприятиятнень нормативной правовой регулированиянь одкстомтомась, истя жо те енкссонть государственной лезксэсь, цифровой трансформациясь кода масторонь виевгавтомань национальной тевтнестэ вейкесь ды лия кевкстематне.
Промксонть панжомсто, Игорь Комаров тешкстызе, коронавирусонь эпидемиянь а нолдамонь шкастонть эряви витемс од тердематнень ды стакачитнень, конат аравтозь эрицятнень ды бизнесэнть ванстомс. Полпредэсь истя жо тешкстызе, ютазь иень прядовоманть коряс округонь регионтнэсэ коронавирусонь инфекциясо сэредемань коряс тевтне вадрялгадсть, ансяк лавшомгадомс зярс а мереви. Ванновт ало эряви кирдемс истят ёнкстнэнь, кода эпидемиологиянь тевтнень ванноманть коряс башка ограничениятнень каямось, больницятнень важодемань свалшкань лувонтень ютавтомась, тень пингстэ таркатнень резерванть ванстомась, коронавирусонь коряс тестированиянь ютавтомась, ковидсэ сэредицятненень лекарстватнень явомась.
"Неень шкане прявт кевкстемакс ашти ливксэнь путомась. Целанек округось невти вакцинациянь темпа, конась аламодо седе вишкине Россиянь невтевкстнэнь коряс. Государствань прявтось аволь весть тешкстакшнызе вакцинациянь темпатнень кастоманть коллективной иммунитетэнть тееманзо туртов. Тень эйстэ ашти эпидемиянь изнямось, ограничениятнень каямось", - мерсь Игорь Комаров.
"Прявт кевкстемась течи - коронавирусонь инфекциянть а нолдамось ды весемесь, мезе тень марто сюлмавозь. Неень шкане лавшомгадомс эпидемиянь а нолдамонь тевтнень пек рана. А вана кода ды зярдо тень эряви теемс видестэ - кортавить Ассоциациясонть", - мерсь Мордовия Республикань Прявтонть тевтнень топавтыцясь Артём Здунов. Промксонть прядовомадонзо мейле журналисттнэнь кевкстемаст лангс каршо валонь максомсто, республикань руководителесь тешкстызе: "Свалшкане эряви ваномс коронавирусонь инфекциянть марто сюлмавозь тевтнень мельга. Мон эрьва недля ютаван коронавирусонь инфекциянть профилактикань ды контролень коряс оперативной штаб весе специалисттнэнь ды муниципальной образованиятнень прявттнэнь марто. Сехте прявтось - федеральной центрасто кучовиця вакцинанть районтнэс ды ливксэнь путомань таркатнес куроксто пачтямось. Минек ливксэнь путомань 42 пунктт ды 17 мобильной пунктт - сыньгак пек лездыть. Лездыть волонтертнэ - медицинань малав 100 волонтёрт примить участия ливксэнь путомасонть. Ды, нама, пек эряви толковамонь важодемась, весе чарькодест: ливксэнть эряви путомс эрицятнень 60 проценттнэнень - те весе обществанть туртов сэтьмечинь невтевксэсь".
"Мордовиянть туртов те шкастонть прявт тевекс ульнесь эрицятнень ванстомась ды, нама, экономикань невтевкстнэнь а валгстомась. Теезь ламо, куроксто важодсь оперштабось, витевсть медицинань лезксэнь кевкстематне. Кода невтизе течинь кортамось, регионтнэсэ стакачитне малавикст, малав весенень удалась сынст витемс", - мерсь Мордовия Республикань Государственной Собраниянь Председателесь Владимир Чибиркин.
Пленарной заседаниянь повесткань омбоце кевкстеманть коряс Игорь Комаров тешкстызе, прявт тевесь - технологической виевгавтомантень лездамось ды важодемань производительностенть кастомась. Те иенть ушодовомс округсонть проектсэнть примасть участия 815 средней ды покш предприятият, конат кандовить экономикань аволь сырьянь отраслятнес. Полпредэсь тешкстызе, важодемань производительностень кастоманть коряс нацпроектэнь топавтомась - прявт енкс, конань лувсо эряви кортамс региононь практикатнень, истя жо Татарстанонь, Нижегородской областень, Пермень краенть. Важодемань производительностень тевенть витемс мереви ансяк бизнесэнть ды научно-технической изнявкстнэнь кооперациянть вельде госуправлениянь органтнэнь таликаст вельде. "Важодемань производительностень кастомась лезды вадрялгавтомс ломантнень эрямост, те минек прявт тевенек", - мерсь полпредэсь. Нацпроектэнь седе тов виевгавтоманть туртов, Игорь Комаровонь валонзо коряс, эряви сбалансированной законодательной обеспечения. Те кевкстеманть коряс пачтямо истя жо тейсь Татарстан Республикань Государственной Советэнь Председателесь Фарид Мухаметшин: "Эсенек туртов минь тешкстынек зярыя прявт енкст, конатнень ютксо ванстомань производствась, производствань процесстнэнь ды важодемань условиятнень оптимизациясь. Минек уш топавтовить зярыя программат ды проектт, конат аравтозь важодемань производительностень куроксто кастомантень. Те тевесь истя жо путозь 2030 иентень Стратегиясонть, конась кемекстазь республикасонть".
Цифровой трансформациядонть кортамсто Игорь Комаров тешкстызе округсонть цифровой инфраструктуранть виевгавтомань покш уровнянть. Полномочной представителесь ледстизе, РФ-нь Президентэнть Владимир Путинэнь кармавтоманзо коряс весе субъекттнэсэ улест кемекстазь экономикань, социальной сферань ды госуправлениянь прявт отраслятнень цифровизациянь региононь стратегиятне. "Округонь регионтнэсэ улить важодевкст, конатнень эряви шаштомс весе масторонть келес", - тешкстызе полпредэсь. Татарстан Республикасо цифровой трансформациянь опытэнть коряс ёвтнесь государственной управлениянь цифровой виевгавтомань, информационной технологиятнень ды связень министрась Айрат Хайруллин. "Течи минь ютатанок искусственной интеллектэнть мельга панемантень. Бути информатизациянть вельде вадрялгавтови производствась, ансяк тевтнень ветямонь лувось ванстови, сестэ цифровой трансформациянть вельде полавтови клиентэнть ды услугань пачтицянть ютксо вейсэнь важодемань механизмась ды принципесь, бути кортамось моли натой государствадонть", - тешкстызе сон.
Промкссонть евтазь весе ушодкстнэ пачтявить РФ-нь Государственной Думас ды Правительствас.
Ассоциациянь промксонть лувсо Мордовия Республикань Государственной Собраниясь тешкстась Пермень краенть Законодательной Собраниянть ды Оренбургонь областень Законодательной Собраниянть ютксо вейсэнь важодемадо вейсладямо.