Мордовиянь прявтошсо 12 чассто "Пингеде пингес Россиянть марто" памятникенть ваксс пурнавсть 14 тёжат ломанть, сынь ёвтасть седеймарямо Санкт-Петербургсо апрелень 3-це чистэ лисезь терроризмань акттсонть маштовозетнень малавиксэст ды томбавозетнень лемс. Тей сакшность общественной организациянь, политической партиятнень ды важодемань коллективтнень представительтне. Акциянтень сакшнось Мордовиянь Прявтось Владимир Волков. Пурнавозетне чатьмонемань минутасо ледстизь терроризмань атакатнесэ маштовозетнень.
Ветеранонь представителесь тешстызе, Петербургось течи печти стака шка.
"Неть теракттнэ ютавтовить лия оштнесэяк, мезесь яви минек обществанть. Петербургонь эрицятне печтизь стакадояк стака Ленинградонь блокаданть. Ансяк стакадояк стака условиятне - вачочись, якшамось, - эзизь вишкалгавто ошонь эрицятнень бажамост Изнямонтень. Ды Изнямось саезель минек ломантнень вейсэндявоманть вельде. Эзизь изня фашисттнэ ошонь эрицятнень, ды мон кеман, а удалы явомс минек обществанть неень шкань зыянов тевтнень вельде. Те сыненст зярдояк а топавтови", - тешкстызе ветеранось.
"Электровыпрямитель" АО-нь важодицясь Алексей Кузнецов тешкстызе, Санкт-Петербургсо лисезь зыянось кадсь тешкс минек масторонь эрьва эрицянть седейс. "Минь, заводонь важодицят, ёвтатано седеймарямо сезевемасонть маштовозетнень малавиксэст ды томбавозетнень лемс. Валдо ледстнемат сетненень, кить уш арасть ютксонок. 75 иеть Мордовиянь моданть лангсо важоди минек предприятиясь. Ды минь кирдтяно мельсэ, заводонть чачома тарказо - Ленинградось. Террористтнэ арсесть те сезевеманть вельде явомс ды тандавтомс минек. Ансяк те сыненст эзь удала", - мерсь важодицясь.
Акциянтень пурнавозетненень аудиообращениянть вельде пшкадсь Саранскойсэ чачозесь Дмитрий Глазков, сон томбавсь Петербургсо сезевеманть шкасто. Сон ёвтась сюкпря весенень, кие лездась тензэ.
ЛДПР-нь, "Справедливой Россиянь" ды "Единой Россиянь" представительтне тешкстызь, террористтнэнь прявт тевест - видемс пелема ды а кемема минек обществантень, тень каршо минь отвечатано тенст терроронть каршо вейсэндявомасонть. Эрьва эрицянтень эряви чарькодемс ответственностенть масторонь вандынь чинть кисэ.
Киргизиясто студентэсь, конась тонавтни Мордовиянь государственной университетсэнть, мерсь, республикань вузтнэсэ тонавтниця омбо масторонь весе студенттнэ кирдить ризкс Россиянть марто вейсэ ды вемельсэ а кирдить апрелень 3-це чинь террористической атаканть.
Инна Горшкова, конась сась тонавтнеме Саранскоев Петербургсто, пшкадсь акциянь участниктненень. "Маштовсть монь иень од ломанть, студентт ды мон апак кавтолдо ёвтан, терроризмась - 21-це пингень чума, конанть марто миненек эряви бороцямс вейсэ".
Теде мейле акциянь участниктне путсть цецят терактсо маштовозетнень ледстнемга.