Лездамонь од ёнксонть ёвтызе региононь руководствась ды сонзэ кирдизе депутатонь корпусось те иень эйзюрковсто, сон нолдазь тевс сундерьковонь 1-це чистэнть саезь. Сон максови бюджетэнь енкссо важодицятненень, государственной ды муниципальной служащейтненень, конат 2025-це иень сундерьковонь 1-це чистэ саезь 2027-це иень сундерьковонь 1-це чис теевить васенце эли седе меельце эйкакштнень тетякс-авакс. Тень пингстэ мирдть-нить эли аволь пешксе семиясонть эйкакшонть авазо эли тетязо эряст Мордовиясо, ветяст важодемань тевдеема регионсонть иеде аволь седе аламо сиведемань договоронь тешкстамо шкантень (те а кандови СВО-нь участниктненень). Лездамонь тевтнень получамонть туртов эште вейке прявт вешемась – семиянть эрямонь таркань коряс эрявиксчись (семиянь эрьва членэнть лангс кандовозо 18 кавонзазь метратнеде аволь седе ламо).
Тешкстасынек, региононь эрицятнень социологической кевкстнематне невтизь – эрямо таркань кевкстемась эйкакштнень чачтоманть туртов кирдиця прявт тувталтнэстэ вейкесь.
Республикань Кудосонть ютавтозь промкссонть Мордовиянь Прявтось тешкстызе, кемекстазь законось ды сиведемань программась – Мордовиянь бюджетниктнень семиятненень лездамонть ды региононть ды масторонть икеле аштиця демографиянь тевтнень витеманть туртов прявттнэстэ вейкесь.
Промксонть лувсо пачтязель, Мордовиясо ушодызе важодеманзо Эрямо таркатнень строямонь ды эйкакш марто семиятненень эрямо таркатнесэ лездамонь виевгавтомань Республикань фондось. Кавто тарготнень перть тосо важодицятненень уш пшкадсть 45 ломанть.
Программанть лувсо кавто иес эрямо таркань фондось карми 292 квартират Саранскойсэ ды Рузаевкасо. Неень шкане строявить ламо квартирань кавто эрямонь кудот: вейкесь – республикань прявтошсо, омбоцесь – чугункань кинь важодицятнень ошсо. Саранскойсэ строявиця кудонть вакссо уш ули школа, сы шкастонть карми эйдень кужо. Семиятненень васенце квартиратне максовить сы иень омбоце пельксэнть ушодовомсто. Бути сиведемань договоронь шканть перть семиясонть а чачить эште эйкакшт, рамамонь правась сы бюджетэнь сферасо 10 иетнень перть важодемадонть мейле эрямонь помещениянть 70% рынкань питненть коряс. Бути семиясонть чачить эште эйкакшт семиянть карми возможностезэ шкадо икеле рамамс эрямо тарканть питненть коряс, конань кемекстызе программась. Сиведемань договоронь кемекстамодо ды программас совамодо мейле колмо ды седе ламо эйкакшонь чачтомсто
семиянть ули правазо рамамс эрямо тарканть 0,1% питненть коряс.
Квартиратне максовить социальной отделка марто – те вадря лезкс од семиянть туртов. Эрямо таркань покшолманть мельсэ кирдезь сиведемань питнесь карми ковозонзо 1600 целковойтнеде аволь седе ламо.
«Бюджетэнь енкссо важодицятне кадовкшность мельтеме, сыненст эзь максово возможность получамс льготань эрямо тарка. Ней сынст истямо возможностест ули, – тешкстызе Артём Здунов. – Карматано келейгавтомо сиведемань программанть. Самай бюджетэнь енкссо важодицятнень асатоманть минь нейтяно весемеендо, седе пек районтнэсэ. Кеман, истямо строямонть вельде минь ламонь кирдсынек республикасонть, эрицятне ламолгадыть. Миненек эряви строямс, минь улевельнек ламонек».
Мордовия Республикань Прявтонь пресс-службась