Вастовомасонть ульнесть Мордовиянь Промышленностень, наукань ды од технологиятнень министрась Игорь Губайдуллин ды «Технопарк-Мордовия» АУ-нь генеральной прявтось Андрей Николаев.
Игорь Дроздов сакшнось Мордовияв РФ-нь Федеральной Собраниянь Федерациянь Советэнь Председателенть пингстэ Интеллектуальной ули-паронь кевкстематнень коряс советэнь выездной промксонтень. Республикасонть сон теевсь содавиксэкс инновациянь прявт площадкатнень важодемаст марто.
Игорь Дроздов мерсь: «Республиканть ули покш потенциалозо, ламо енксонзо, конатнень коряс мереви вейсэ лезэвстэ важодемс, улить компаният, конатне, паряк, кармить Фондонь резидентэкс».
Ней «Сколково» Фондонь региононь операторонть - «Технопарк – Мордовия» АУ-нть - 7 квалифицированной резидентэнзэ, 2 - анокстыть кармамс. Игорь Дроздов тешкстызе, неи покш потенциал Н.П. Огарев лемсэ МГУ-нть марто вейсэнь важодемасонть. Тедеде «Сколково» юрсо арсеви нолдамс тевс университетэнь стартаптнес инвестициятнень пандомань механизманть. Ярмактнень мереви ютавтомс ванкшноматнень-тонавтнематнень ды важодевкстнэнь ветямонтень эли проекттнэнь коряс, конатнесэ улить научно-технической одчинь енкст, интеллектуальной тевдеемань цетавкстнэнь коммерциализациянтень.
Артём Здунов кирдизе важодемань те енксонть: «Мордовиянь госуниверситетэнть туртов те вадря возможностть, сынст эряви нолдамс тевс!»
Региононь руководителесь ды Игорь Дроздов кортасть региононь индустриальной партнертнэнь марто вейсэнь тевдеемадонть, компаниятнеде, конатненень эрявить инвестицият, кулянь пурнамонь коряс автоматизированной программань важодемадонть, истя жо лия кевкстематнеде.
Ваннызь меленть-арсеманть, конань Мордовиянь Прявтось евтызе Интеллектуальной ули-паронь кевкстематнень коряс советэнь промкссонть: масторонь субъекттнэсэ эли округтнесэ интеллектуальной праватнень коряс специализированной куншкакуротнень теемадост. Игорь Дроздов мерсь, истямо куншкакуронтень мереви важодемс ПФО-нть лангс медиациятнень лувсо, региононтень лезкс мереви явомс «Сколково» пингстэ важодиця Интеллектуальной ули-паронь куншкакуронь специалисттнэнень.
«Неть возможносттнень эряви саемс ванновт алов. Минек предпринимательтне содаст, ков пшкадемс патентэнь ванкшноматнень-тонавтнематнень ютавтомсто, пелькстамонь тевтнень лисемстэ», - пшкадсь Мордовиянь Прявтось МР-нь Промышленностень, наукань ды од технологиятнень министрантень.
Мордовия Республикань Прявтонь пресс-службась