Мордовиясо чачозентень Григорий Александрович Слугиннэнь мужестванть ды героизманть кисэ, конат невтезь служебной долгонть топавтомсто, Россиянь Федерациянь Героень лементь максомадо Указонть тешкстызе Россиянь Президентэсь Владимир Путин. Героень куломадонзо мейле.
Чадыковонь 27-це чистэ Республикань Кудосонть ютавтовсь военнослужащеень семиянтень башка отличиянь тешксэнь пачтямонь церемониясь. Тосо ульнесть Мордовиянь Прявтось Артём Здунов, Россиянь сенаторось Петр Тултаев, МР-ва прявт федеральной инспекторось Анатолий Гулин, Саранскоень ды Мордовиянь митрополитэсь Зиновий, героенть семиязо ды мартонзо служицятне, юнармеецтнэ ды кадеттнэ.
Григорий Александрович чачсь Орданьбуень енксонь Баеньбуесэ. Школань прядомадо мейле, тиринь масторонтень служамонь эсь призваниянть марямсто, мольсь тонавтнеме Армиянь Генералонть Маргеловонь лемсэ Рязанень гвардейской высшей воздушно-десантной командной училищав. Специальной военной операциянь васенце читнестэ саезь топавтсь боевой ды специальной тевть Украинань демилитаризациянь ды денацификациянь коряс. Офицерэсь аволь весть примась превей тактической решеният, конатнень вельде топавтовсть аволь ансяк боевой тевтне, истя жо ванстовсть личной составонь эрямотне. Григорий Александрович казезь «За отвагу» медальсэ ды кавксть Мужествань ордентнэсэ.
Ютазь иень таштамковсто гвардиянь капитанось Слугин топавтсь боевой тевензэ Запорожской областень Вербовое велень лембе енксонь оборонанть коряс. Веть ятось ушодсь виев каявома. Штабонь прявтось Слугин саизе эсензэ лангс артиллериянь толонь управлениянть. Мордовиясо чачозенть виде тевдееманзо вельде ятонь войскатне кандсть покш емавкст ды кармасть потамо. Ятонтень эзь саеве эрямонь пунктось, нолдасть дрон – сонзэ эзь удала кундамс. Гвардиянь капитанось маштовсь томбавоматнень эйстэ. Боецэнть ды сонзэ ине тевенть пурнавозетне ледстизь чатьмонемань минутасо.
«Минек Верховной Главнокомандующеенть решениянзо коряс Григорий Александрович казезь специальной военной операциянь боевой тевтнень топавтоманть пингстэ мужестванть ды отваганть кисэ. Сонзэ лемезэ свалшкас сермадозь минек ине масторонь историянтень, – мерсь Артём Здунов. – Неть наградатнень удало кементь пек стака специальной боевой операцият».
Республикань Прявтось пшкадсь боецэнть тетянстэнзэ-аванстэнзэ ды нинстэнзэ: «Мельвановикс Александр Григорьевич, Татьяна Васильевна, Алена Михайловна, тынк мирденк ды церанк ульнесь алкуксонь офицерэкс, алкуксонь ломанекс, алкуксонь героекс. Ды маштовсь, педе пев эсь воинской долгонть топавтозь. Истямокс сон ульнесь ды кадови весень минек туртов! Сонзэ ине тевезэ свалшкас кадови семиянь ледстнематнес, Мордовиянь ды весе масторонь историяс. Сон минек кисэ тынк марто максызе эсь эрямонзо! Сюконято икеленк истямо ломанень кастоманть-тонавтоманть кисэ!»
Артём Здунов тешкстызе, ней весе масторонть икеле ашти вейке вейсэнь тев – изнямс. Россиянь Героесь ловсь эсь долгокс ванстомс Тиринь масторонть – те пек вадря невтевкс од ломантнень туртов, эсь масторонь эрьва эрицянть туртов.
Мордовиянь Прявтось максызе «Золотая звезда» медаленть героенть нинстэнзэ Алёна Слугинанень ды тетянстэнзэ-аванстэнзэ – Александр Григорьевичнень ды Татьяна Васильевнанень.
Россиянь Миноборонань Воздушно-десантной войскатнень радиационной, химической ды биологической ванстомань прявтось Алексей Гончаров мерсь эсь боевой ялгадонть: «Сон ульнесь героекс эрямосо ды кармась героекс тюремасо!»
Наградань максомань церемониядонть мейле Артём Здунов кортась героенть тетянзо-аванзо, нинзэ ды лелянзо Александр марто, сон истя жо СВО-нь ушодовомсто саезь ванстась масторонь мельтнень-ванновтнень.
Героенть авазо - Татьяна Васильевна – евтнесь, церазо свал ульнесь мелень явицякс, икелензэ путозь тевтнень топавтыцякс, Тиринь масторонь алкуксонь патриотокс. Топавтомс масторонть икеле воинской долгонть – ульнесь сонзэ бажамокс.
«Секундаяк эзинь арсе, зярдо Григорий мерсь: военнослужащеенть марто сы шкань эрямось карми аволь шождакс, – мерсь низэ Алёна. – Сон ульнесь монь сехте малавикс ломанем. Мон весемесэ кирдинь сонзэ, кеминь сонзэ эйс ды маринь каштанчи. Минек семиянть туртов те пек покш емавкс»
Гвардиянь капитанонть Григорий Слугинэнь ине тевесь – те семиянь каштанчи, республикань ды весе масторонь каштанчи. Те алкуксонь невтевкс эйкакштнень туртов. Зярдо, секундаяк апак арсе эсь прядонть, ломанесь сти эсь Отечестванть ванстомо. Истят воинтнэнь вельде, кода Григорий Слугин, минек масторонть кияк ды зярдояк а изнясы. А тейсы тень нейгак!
Мордовия Республикань Прявтонь пресс-службась