Сессиянь промкссонть ульнесь вейке кевкстема – Темниковань енксонь прявтонть кочкамодонзо.
Райононь руководителень таркантень бажасть понгомс колмо ломанть, депутаттнэ вемельсэ кирдизь райононь прявтонь тевтнень топавтыцянть Олег Родайкинэнь кандидатуранть. Сон чачсь Ташто Шайговасо, Темниковань енксонь прявтонь васенце полавтыцякс аравтомадонть икеле ульнесь «Мордовмелиоводхозонь» Управлениянь прявтокс.
Мордовиянь Прявтось евтась поздоровт од руководителентень кочкамонть кувалма ды тешкстызе, Темниковань енксось – республикань Правительствань башка ванновт ало. Касомань точкатнестэ вейкесь сюлмавозь паломникень-туристэнь кластерэнь виевгавтоманть марто. Редявикс ярмакт пачтявить Темниковань вадрялгавтомантень-мазылгавтомантень, сы иестэнть прядови Санаксаронь монастырентень газонь ветямось.
Истя жо тешкстазельть райононь талновтыця кевкстематне. Башка мелень явома вешить китне, коммунальной инфраструктурась, истя жо ванськавтомань сооружениятне.
Мордовиянь Прявтось тешкстызе, социальной прявт тевтнень топавтоманть туртов райононтень эряви кастомс бюджетэнть эсензэ доходтнэнь, виевгавтомс те таркань инвестициянь мельстуеманть.
Республикась, нама, карми лездамо райононтень весе ушодкстнэсэ.
«Тынк куш-кодат мельтненень-арсематненень карматано бажамо лездамс», – мерсь Артём Здунов.
Олег Родайкин евтась сюкпря депутаттнэнень явозь кемеманть кисэ. «Кеман тынк лезксэнть лангс. Максан вал видестэ ды парсте топавтомс ланогозон путозь тевтнень», – мерсь сон.
Мордовия Республикань Прявтонь пресс-службась