«Минек цёратненень эряви велявтомс эрямонтень - муемс вадря важодема, тонавтнемс. Сехте прявтось – эрямонть ламо ёнксонзо, секскак сави печтямс улиця кардамотнень. Паро, появить автомобильть, конат лездыть минек ветерантнэнень олясто ардтнемс эрьва ков – оймсеме, семиянть марто. Тейтяно паро тев, сонзэ эряви поладомс!» - тешкстызе Артём Здунов.
Мероприятиясонть истя жо ульнесть МР-нь Правительствань Председателень васенце полавтыцясь Галина Лотванова, «Защитники Отечества» Госфондонь филиалонь руководителесь Алексей Герасименко, спецоперациянь ветерантнэ ды Фондонь важодицятне.
Александр Крылов од порасто ёроковсто налксесь футболсо, изнясь республикань турниртнэсэ. Важодсь строямонь енкссо. 2024 иень тунда Александр контрактонь коряс сыргась фронтов, вечкевикс пильгеоскань клубонть лемс саизе «Спартак» позывноенть. Гвардиянь рядовоесь служась старшей разведчикекс, секе иень умарьковсто стакасто ранязель, мезенть кувалма кадовсть пильгевтеме.
Александр Крылов казезь «За отвагу» медальсэ ды Мужествань орденсэ. Госпитальстэ велявтомадо мейле СВО-нь ветеранось алтызе прянзо адаптивной спортонтень. Сон кармась озадо волейболонь коряс СВО-нь ветерантнэнь сборной командань капитанокс ды ульнесь «Кубок защитников Отечества» кавто пелькстамотнесэ. Ковровсо аволь умонь пелькстамотнесэ Александр Крылов сайсь сырнень медаль столь лангонь тенниссэ.
«Машинась целанек теезь киртязь возможность марто ломантнень туртов – весемесь вадря, ютынь тонавтнема. Ёжось пек паро! - ёвтнесь СВО-нь ветеранось. - Васняяк молян эсень семиянтень, кецявтсынь сынст, сынь монь кисэ пек мелявтыть свал, лездыть, мезе бу мон а тее».
Мордовиянь Прявтось истя жо явшесь следж-нурдот спортонь телень видтнэнь туртов Александр Крыловнень ды Иван Мартыновнень. Спортонь реабилитациянь технической средстватне алтавить адаптивной спортонтень ды рамазь «Защитники Отечества» Госфондонть вельде. Спортсментнэ совить следж-хоккеень коряс СВО-нь ветеранонь региононь командантень.
Теде башка, те чистэнть СВО-нь ветеранонтень Сергей Кочетковнень, конань колазь нежедемань-якамонь аппаратось, макссть электропривод марто кресла-коляска.
«Защитники Отечества» Госфондонь филиалонь руководителесь Алексей Герасименко тешкстызе, Фондось, конась теезь Россиянь Президентэнть ушодксонзо коряс, важоди уш малав кавто иеть. Ней структурась ваны малав 3500 ломантнень мельга - те демобилизованной ветерант, спецоперациясо маштовозтнень ды кулявтомо ёмазь участниктнень кудораськес совицят. Фондонь социальной координатортнэ важодить весе районтнэсэ. Сон истя жо ёвтнесь, адаптивной футболонь коряс СВО-нь ветерантнэнь футболонь командась аволь умок велявтсь «Стальная воля» Весероссиянь пелькстамотнестэ, конат ютавтовсть Сочисэ. Мордовиясто спортсментнэ сайсть нилеце тарка масторсонть.
«Тынь невтевкс лиятнень туртов!» - мерсь Алексей Герасименко.
Мордовия Республикань Прявтонь Пресс-службась