Понедельникстэ, даволковонь 10-це чистэ, Мордовиянь Прявтось Владимир Волков важодемань содавтома марто ульнесь Чаунзань ды Отяжбуень ёнкстнэсэ. Ваннынзе сеть объекттнэнь, конат стявтовить кочкицятнень кармавтомаст коряс.
Васняяк Мордовиянь Прявтось ульнесь Чаунзасо водозаборонть строямонь таркасонть, сон стявтови «Экология» раськень проектэнть, конань яволявтызе Россиянь Президентэсь В.В.Путин, ды «Чистая вода» региононь проектэнть лувсо. МР-нь Прявтось кармавтсь эрязкавтомс строямонь темпатнень. «Объектэнть эряви прядомс 2021 иень умарьковонтень. Сонзэ панжомадонзо мейле эрицятненень карми пачтявомо ванькс вадря ведь», – тешкстызе сон.
Владмир Волков ледстизе, 2020 иень якшамковсто саезь «Комплексное развитие сельских территорий» программанть лувсо максови велень льготань ипотека, весемезэ 3% иезэнзэ, башка эрицятненень – 0,1%. Тень кувалма Мордовиянь Прявтось кармавтсь районсонть анокстамс седе ламо таркат кудотнень стявтомаст туртов, ветямс весе коммуникациятнень, ацамс ки.
Велень ипотекань вешематнень коряс эрямо таркань кредитэсь максови 25 иес. Сонзэ мокшолмазо 3 млн. целковойде аволь седе ламо. Ярмактнень мереви ютавтомс аволь ансяк эрямо таркнаь строямс, истя жо аноконть рамамс эли совамс ламо квартирань кудонь долевой строямонтень.
Комсомольский посёлкасонть Владимир Волков якась «Красная шапочка» эйдень кужонтень, конась панжозь те иень якшамковсто. Тесэ ваннынзе весе нупальтнень, кортась эйкакштнень ды тетятнень-аватнень марто.
МР-нь Прявтонть валонзо коряс, школадо икеле образованиясь – эйкакштнень анокстамонь прявт пелькс. Васенце классос эйдетне сыть уш парсте анокстазь. «Минек прявт тевенек теемс условият эйдетнень туртов. Кото иетнень перть Мордовиясо строязь 60 эйдень кужо. Маласо шкастонть панжовить эштё вейксэ, ансяк кавтотне – Саранскойсэ. Те важодемась ули поладозь», – мерсь сон.
Теде башка, МР-нь Прявтось тешкстызе, Чаунза ёнксонь кочкицятнень кармавтомасост тешкстазель райононь культурань кудонть коряс кевкстемась. «Экспертэнь комиссиянть заключениядонть мейле ваннови ДК-нть марто кевкстемась. Чарькодеви, мезе эряви теемс: педе пев витнемс ташто зданиять эли строямс од. Те кевкстемась кадови монь ванновт ало», – толковизе сон.
Владимир Волков кортась медицинань обслуживаниянь качестванть кастомадонзо. Республикасонть поладови ФАП-нь строямось. Ансяк тедеде арсевить панжомс 73. Тешкстызе, ули витнезь Комсомольскоень поликлиникась ды больницясь.
Эштё вейке кевкстемакс кармась школань образованиясь. МР-нь Прявтонть валонзо коряс, эряви аволь ансяк витнемс зданиятнень, истя жо пештемс потмонть. Текень пингстэ велень школатне иляст явово ошонсетнень эйстэ. «Республикасонть панжозь «Касомань точкат», теевить эйкакшонь технопарконь филиалт, сехте прявтось – од лувсо анокстамс тонавтыцятнень. Вадря стимулокс карми «Земский учитель» программась, конань лувсо явови 1 млн целковойть», – тешкстызе сон.
Тетятне-аватне эсест пельде ёвтасть сюкпрянь валт республикань руководствантень ды МР-нь Прявтонтень лезксэнть кисэ, истя жо од эйдень кужонть кисэ, конась пек эрявсь райононь эрицятненень.
Мордовиянь Прявтось истя жо ульнесь «Чамзинская» птицефабрикань од площадкасонть, конась панжозь ютазь иень прядовомсто. Тесэ 24 корпуст, эрьвасонть кастовить 58 тёжат бройлерт. Весемезэ тесэ ве шкане кирдевить 1 млн нармунть. Вейке нармуненть сталмозо – 2,6 килот.
«Истят невтевкстнэс бажаст весе минек велень хозяйствань товаронь нолдыцятне!» – тешкстызе Владимир Волков.
Тешкстасынек, те объектэнть максомсто районсонть теезь 47 важодемань од таркат, средней зарплатась – 31 тёжат целковойть. Объектэнь инвестициянь питнесь – 940,8 млн целковойть.
«Миненек эряви вадрялгавтомс минек ломантнень эрямост, иляст туе уцяскань вешнеме республикань томбалев. Тень туртов теевить паро зарплата марто важодемань таркат. Минь панжтанок производстват аволь Саранскойсэ, а минек велетнесэ», – мерсь Владимир Волков.