Мордовия Республикань Прявтось Владимир Волков вастовкшнось Финляндиянь делегациянть марто, конань прявтсо ульнесь Южная Карелия региононь прявтось Матти Вииалайнен. Кавто чинь перть инжетне ванкшнызь республикань ды сонзэ прявтошонь культурань, истя жо промышленностень, 2018 иень Футболонь коряс масторлангонь чемпионатонтень анокстамонь объекттнэнь, наукань ды тонавтнемань кушкакуротнень.
Шумбракстнемань валсонть Владимир Волков тешкстызе, Финляндиянть ды Мордовиянть ютксо духовной, культурань ды экономикань сюлмотнень пек кезэрень ундоксост, тень пингстэ меельце кемень иетнестэ сынь редявиксстэ виевгадсть: «Мордовиянть ды Финляндиянть ютксо культурань ды наукань сюлмотне максыть кеме лув экономикань вейсэнь важодемантень. Покш тарка теньсэ саи Финнэнь-угрань раськень ассоциациясь, минек ВУЗ-тнэнь вейсэнь важодемась – ансяк Н.П.Огарев лемсэ МГУ-сонть тевс нолдазь Финляндиянь тонавтнемань куншкакуротнень марто научно-технической ды творческой раськеютконь вейсэнь важодемадо 7 договорт. Минек студенттнэ, преподавательтне, культурань ды наукань важодицятне максыть вейкест-вейкест туртов содамочить-ёрокчить вейсэнь проекттнэнь лувсо – научно-практическойть, творческойть, фольклоронь, музеень-этнографиянь, келень. Минь тенень макстано пек покш смусть, кода экономикань сферасо вейсэнь важодемантень».
Региононь Прявтось истя жо тешкстызе, редявикс лезэ максы покш технологиянь производствань, истя жо строямонь ды чувтонь обработкань сферасо Финляндиянь предприятиятнень марто вейсэнь важодемась, ёвтась анокчи поладомс те ды лия енкссо вейсэнь важодеманть.
Южная Карелия региононь прявтось Матти Вииалайнен финнэнь весе делегациянть пельде ёвтась сюкпря Республикань Прявтонтень лембе вастоманть кисэ ды тешкстынзе мелензэ-арсеманзо оптико-волоконной кластерэнь предприятиятнень коряс: «Республиканть редявикст изнявксонзо покш технологиянь сферасонть, минь макстано покш питне проекттнэнь результаттнэнень, конатнень топавты Мордовиясь оптико-волоконной сферасонть, кабелень ды светотехникань продукциянь нолдамсто».
Матти Вииалайнен тешкстынзе республикань руководстванть виензэ ды бажамонзо раськень ды культурань койтнень-кирдатнень ванстомасо, Ташто Теризморгань раськень культурань куншкакуронть, конанть делегаттнэ ванкшнызь икеле чистэнть, ды Эрьзянь музеенть лемдинзе «лия ёнов а молиця объектэкс».
Вейсэнь важодеманть поладомадо кортамсто вастовомасонть кемекстазь решения одс ванкшномс Мордовия Республиканть ды Южная Карелия региононть ютксо вейсэнь важодемадо меморандумонть сёрмадстомадо кевкстеманть. Истя жо гуманитарной ды экономикань сферасо тевс нолдазь проекттнэнь поладомаст. Тешкстазель, башка мель явома 2018 иень Футболонь коряс масторлангонь чемпионатонтень анокстамонь ды ютавтомань шкасто вейсэнь важодемантень, истя жо Финляндиясто Саранскоев сыця футболонь ваныцятнень туртов авиасообщениянть ладямодо. Арсеви ванкшномс вейсэнь важодемань лувонть спортонь сферасо, косо, кода тешкстызь вастовомань участниктне «Мордовиянть ды Финляндиянть улить васодемань ламо ёнксост, истят кода – хоккеесь, биатлонось». Истя жо кортасть туризмань сферасо вейсэнь важодеманть кемекстамодо.