Владимир Волков ёвтась поздоровт эрзянь ученоентень-филологонтень ды ВОВ-нь участникентень Дмитрий Васильевич Цыганкиннэнь 95 иень юбилеензэ коряс

Владимир Волков ёвтась поздоровт эрзянь ученоентень-филологонтень ды ВОВ-нь участникентень Дмитрий Васильевич Цыганкиннэнь 95 иень юбилеензэ коряс

Ожоковонь 22-це чистэ 95 иеть топодсть филологиянь наукань докторонтень, Н.П.Огарев лемсэ Мордовиянь государственной университетэнь Эрзянь ды мокшонь кельтнень кафедрань профессоронтень Дмитрий Васильевич Цыганкиннэнь. Содавикс ученоентень, Ине Отечественной войнань ветеранонтень ды участникентень юбилеень коряс поздоровт ёвтась Мордовиянь Прявтось Владимир Волков.

«Эрямосонк тынь неиде ламо, ютыде стака варчавксонь пачк. Тынь алкуксокс ванстыде Тиринь масторонть Ине Отечественной войнань иетнестэ. Ульниде Орша, Минск, Борисов, Витебск оштнень олякстомасо, пачкодиде Кенигсбергень видьс. Казезьтядо Ине Отечественной войнань II степенень орденсэ, «За отвагу» ды «За взятие Кенигсберга» медальтнесэ.

Сэтьме шкастонть Тынь алтынк прянк наукантень, од ломантень тонавтомантень ды превс путомантень. Тынк важодемань кись кеместэ сюлмавозь Мордовиянь образованиянть ды науканть, обществанть ды государстванть лезэс тевдееманть марто. Тынь сермадыде ды нолдыде 300 ламо наукань ды тонавтомань-методикань важодевкст, истя жо фонетикань, валонь теемань, диалектологиянь, эрзянь-мокшонь ды финнэнь-угрань лия раськень топонимикань ды историянь коряс учебникть ды тонавтомань пособият.

Течи Тынь масторлангонь келес содавикс ученой-лингвист, профессор, финно-угроведениянь ды эрзянь ды мокшонь кельтнень коряс покштояк покш специалист.

Филологиянь ды эрзянь ды мокшонь кельтнень историянь коряс Тынк научной важодемантень максозь покш питне. Тень тешкстыть государственной ды общественной ламот казнетне.

Тынь алкуксокс вечксынк кочказь тевенть, Тиринь масторонть. Лиятнень эйстэ Тынк свал явсь наукасо вешнемантень певтеме бажамось ды од содамочитнень пурнамось.

Кеман, Тынк интеллектуальной ды шкинемань ёрокчинк, кочказь тевентенть кемевиксчинк лездыть Тенк седе товгак саемс од изнявкст Тиринь масторонть лезэс!

Седейшкава арсян Тенк ванстомс эрямонтень ды наукантень мелень явоманть, истя жо кеме шумбрачи ды весементь сехте вадрянть!»

Владимир Волков истя жо тешкстась Указ Дмитрий Васильевич Цыганкинэнь Мордовия Республикань государственной покш казнесэ каземадо.

ЦЫГАНКИН ДМИТРИЙ ВАСИЛЬЕВИЧ

Филологиянь наукань доктор, Эрзянь ды мокшонь кельтнень кафедрань профессор. Чачсь: 1925 иень ожоковонь 22-це чистэ

Чачома таркась: МР-нь, Чаунза ёнксонь Мокшалей велесь

Раськень коряс: эрзя

Важодемань лия тарканзо: сови “Linguistica Uralica” (Таллинн) (Scopus) журналонь, «Сятко» (Саранск) журналонь редколлегиятнес.

Наукасо мелень явоманзо, публикациянзо: эрзянь ды мокшонь ды финнэнь-угрань лия кельтнень фонетикась, лексикась, морфологиясь, синтаксисэсь, валонь теемась, диалектологиясь, топонимикась ды историясь. Анокстась 2 докторт ды наукань 25 кандидатт. Сермадсь-нолдась 300 ламо наукань, наукань-методикнаь важодевкст, учебникть ды учебно-методической пособият.

Казнензэ: Огаревской премиянь Лауреат (1980). Мордовиянь АССР-нь (1985) ды Россиянь Федерациянь (1997) наукань заслуженной деятель. Мордовия Республикань Чаунза ёнксонь Почетной гражданин (2000). Огаревской премиянь (1980), Наукасо ды техникасо МР-нь государственной премиянь (2000), Мордовия Республикань Прявтонь премиянь (2005) Лауреат. «За отвагу» (1945), «За взятие Кёнигсберга» (1945), «За победу над Германией в Великой Отечественной войне» (1945) медальть. Отечественной войнань II степенень орден (1985). Славань III степенень орден (2015). РСФСР-нь Верховной Советэнь Президиумонь (1965), Мордовиянь АССР-нь Верховной Советэнь Президиумонь (1977, 1982) Почетонь грамотат. Мордовиянь Республикань Прявтонь ды Правителсьтвань грамотат ды благодарность.

Башка кулясь: Suomalais-ugrilainen seura финнэнь-угрань вейсэндявксонь член (Финляндия). Информатизациянь раськеютконь академиянь академик.

Мордовия Республикань Прявтонть пресс-службась
Фотось: www.mrsu.ru