Февралень 17-це чистэ Мордовиянь Прявтось Владимир Волков ютавтсь промкс «Юбилейный» ЖК-нь омбоце микрорайононть, Тавла ды Инсар лейтнень, истя жо «Мордовия Арена» стявтовиця стадиононть маласо тарканть вадрялгавтомань кевкстематнень коряс. Подрядчиктнень икелев путозь тевть: 2018 иень Футболонь коряс мирэнь чемпионатонтень анокстамонтень ды ютавтомантень стявтовиця объектнэсэ нурька шкасто тевтнень прядомадо. Промкссонть ульнесть - МР-нь Правительствань Председателесь Владимир Сушков ды сонзэ полавтыцятне, конат ванныть 2018 иень чемпионатонтень строямонь ды анокстамонь кевкстематнень, истя жо Саранск ошонь округонь прявтось Петр Тултаев.
Важодемань шкадонть ды покшолматнеде кортамсто, Владимир Волков тешкстызе: «Те районсонть вадрялгавтомань тевтнес эряви кундамс нейке - миненек кадовсь строямонь вейке сезон! Сонзэ прядовомантень весемесь улезэ анок - стявтозь эрямонь кудотне, эйдень кавто кужот, полициянь отдел, микшнемань центра, истя жо - бульвар, кить ды ялго якамонь тротуарт».
Кемекстазель, васняяк эряви почодомс сы шкань тевтнень туртов тарканть, тень туртов Тавлань ёнкссонтень эряви ускомс модань 300 тёжат кубометрат. Шкань апак ёмавтне эряви ушодомс Тавла леенть чиресэ тевтнес, Волгоградской куронть ды Кочкурова веленть самс кинть ютксо леень чиренть вадрялгавтомга, Тавланть трокс ялго якамонь сэденть строямонть прядомга.
Теде башка, «Юбилейный» эрямонь комплекссэнть, истя жо «Тавла» ГЖК-нть, тедедень строямонь сезонсонть эряви топавтомс автомобилень ды ялго якамонь китнень сетенть, строямс бульвар, педе пев витнемс Посопонь сэденть (Советской ульцяванть Инсар леенть трокс). Теке шкастонть арсеви витнемс Инсарская ульцяванть молиця кинть.
Мордовия Республикань Прявтонть пресс-службась