Мордовиянь Прявтось Владимир Волков даволковонь 6-це чистэ ютавтсь важодемань вастовома Ростехнадзоронь Волжско-Окской управлениянь руководителенть Максим Фомин марто. Кортавсть вейсэнь важодемань прявт ёнкстнэ. Сынст ютксо – сёксень-телень уштомань шкань ютавтомась, производственной зыянов объекттнэсэ сэтьмечинть топавтомась, энергетикань отраслянь предприятиятнесэ зыянтнэнь а нолдамось, электросеттнень вантомась.
Истя жо домкасто кортавсть азортомо гидротехнической сооружениятнень коряс кевкстематне. Кода тешкстызе Мордовиянь Прявтось, те стакачинть витемань коряс важодемась ветяви: бути 2013 иестэ регионсонть ульнесь 101 истямо объект, неень шкане эйстэст кадовсь 23.
«Муниципальной организациятненень эряви прядомс те важодеманть, – тешкстызе Владимир Волков. – Азортомо гидротехнической весе сооружениятненень эрявить муемс азорт, конат кармить топавтомо зыянтомо эксплуатациянть».
Ростехнадзоронь Волжско-Окской управлениянь руководителесь Максим Фомин тешкстызе ведомстванть ды республиканть вейсэнь важодемань покш уровнянть, ёвтась сюкпря Мордовиянь Прявтонтень пшти кевкстематнень витемасонть лездамонть кисэ ды ёвтась кемема сы шкань лезэв важодеманть коряс.
Важодемань вастовомасонть ульнесть МР-нь Правительствань Председателень полавтыцясь – жилищно-коммунальной хозяйствань, энергетикань ды эрицятнень гражданской ванстомань министрась Игорь Чадов ды Мордовия Республикава Ростехнадзоронь Волжско-Окской управлениянь руководителень полавтыцясь Владимир Расшивалин.
Мордовия Республикань Прявтонть пресс-службась