Эрьва иень пачтямосонть Игорь Асабин евтнесь, ошонь бюджетэнь эсь доходтнэ кассть 10% 2022 иень невтевкстнэнь коряс. Мелят удалась киртямс кредиторской задолженностенть, муниципальной долконть. Поладови ули-паронь инвентаризациясь – азортомо 191 тежат объекттнэнь ютксто ваннозь малав 48%.
Бюджетэнь эсь доходтнэнь касомась а ули бизнесэнь апак виевгавто – предпринимательтненень лездамонть туртов Саранскойсэ нолдазь тевс аволь эрямонь нупальтнень сиведемань кисэ пандомань алкиньгавтозь ставкась, сиведемань договортнэ поладовить торгтнень апак ютавто ды лият.
Ошонь администрациясь ды депутаттнэнь советэсь эсь важодемасост башка мель явить СВО-нь участниктнень ды сынст семиятнень марто вейсэнь тевдеемантень (те категориянть туртов улить соцподдержкань зярыя тевть), реабилитациянтень ды гуманитарной лезксэнь пурнамонтень.
«Россиянь Президентэнть Владимир Владимирович Путинэнь, масторонь Правительстванть ды Мордовия Республикань Прявтонть лезксэст вельде субсидиятнень покшолмась, конат явовить федеральной ды региононь бюджеттнэстэ национальной проекттнэнь топавтомантень, кармась 2,74 миллиардт целковойть», – тешкстызе Саранскоень мэрэсь. Истя, «Безопасные и качественные дороги» нацпроектэнть коряс - 175,6 млн целковойть (витнезь китнень кавксо пелькст, вейсэнь кувалмсо 8 вайгельбетнеде седе ламо), «Жилье и городская среда» - 811 млн целковойтнеде седе ламо (прядозь 4-це микрорайонсо кинь строямось, топавтозь ошонь юго-западонь пелькссэнть канализациянь сеттнень одкстомтомась, строязь ведень пачтямонь ды ведень отведениянь сетть Косаревень куронь ды Северо-Восточной шоссень юткссо кварталсонть), «Формирование комфортной городской среды» нацпроектэнть коряс - малав 60 млн целковойть (вадрялгавтозь кудотнень перька 10 ды вейке общественной тарка - П. А. Цаплинэнь лемсэ бульварось), образованиянь школань системань одкстомтомань программанть коряс - 650 млн целковойтнеде седе ламо (педе-пев витнезь кото школат). МР-нь Китнень фондсто субсидиятнень вельде витнезь китнень 18 пелькст (9 вайгельбеть) ды 25 кудотнень перька таркат.
Игорь Асабин евтнесь, ошонь муниципальной предприятиятнень туртов мелят рамазь техникань 60 седе ламо единицат – малав весе те коммунальной машинат. Текень марто, ошонь территориятнень урядамонь ды кирдемань кевкстематне кадовить пштикс. Ней коммунальной службатне усксить ловонть (тедеде ловонь полигононтень ускозь кавксть седе ламо лов) ды урядыть пиземень чудемань таркатнень.
Ошонь администрациясь уш тешкстась контракт кельме асфальтсо латкотнень тееманть коряс. Важодемась ушодовсь Коммунистической курованть сэденть лангсо. Латкотнень теемань прявт важодемантень кундыть асфальтонь заводонть нолдамодонзо мейле (эйзюрковонь прядовомсто – чадыковсто), анокстазь сеть китнень картась, конатнень эряви витнемс, – неть тевтнес путозь 26 млн целковойть. Игорь Асабин истя жо тешкстызе, Коммунистической курованть путепроводось веши педе-пев витнема, те культурань сюпавчинь объект, тень кувалма витнемань тевтнень топавтомс пек стака. Уш кучозь кевкстема историянь-культурань сюпавчинь памятниктнень ютксто сонзэ ливтеманть туртов историянь-культурань экспертизань ютавтоманть коряс.
Саранскоень мэрэсь башка мель явсь азортомо ракшатнень марто сюлмавозь тевтнень лангс – прявтошсонть важоди вейкине номер, конань коряс яволявтоматне саевить чинь-вень перть. Сон истя жо тешкстызе, Саранск ошонь администрациясь пшкадсь мель-арсема марто МР-нь Госсобраниянтень ракшатнень марто ответственной обращениянь коряс закононть примамодонзо (истямо ули лия регионтнэсэ).
Игорь Асабин истя жо яволявтызе республикань Прявтонтень ды депутаттнэнень те иентень мероприятиятнень аравтлувонть – тов совавтозь 58 енкст. Аравтлувстонть 14 мероприятиятне уш важодемасот. Истя, Саранскойсэ арсеви максомс эрямо таркатнень 244 тежат кавонзазь метрат, витнемс китнень кото вайгельбетнеде аволь седе аламо, витнемс фонтанонь валгоманть, Тежа иень площаденть, вадрялгавтомс общественной вейке тарка ды ютавтомс лия мероприятият.
Сессиясонть истя жо кунсолозь пачтямотне промышленной ды перерабатывающей предприятиятнень важодемадост, конат важодить Саранск ошонь округсонть.
Прявт енкстнэстэ вейкесь – общественной транспортонь вадря важодемась. Саранскойсэ эрицятнень транспортонь обслуживаниянь коряс важодемадонть пачтясь Саранскоень прявтонь васенце полавтыцясь – Саранск ошонь округонь администрациянь ошонь хозяйствань департаментэнь прявтось Илья Соколов. Ней ошонь эрицятнень усксить техникань 185 единицат, ансяк пек а сатыть ветницят. Муниципальной предприятиясонть улить зярыя енкст важодицятнень тердемаст туртов, социальной лезксэнь тевть.
Мордовиянь Прявтось Артём Здунов явсь мель прявт кевкстематнень лангс, конатнень эйстэ ашти республикань прявтошонь касомась-виензамось. Текень пингстэ сон тешкстызе, сэтьме эрямонь весе енкстэ марявить аволь покшокс сеттнень коряс, мезе моли СВО-нь ютавтомань таркатнесэ – маштовозь боецтнэнь ледстизь чатьмонемань минутасо.
Республикань руководителесь явовтызе ошонь властень ванновтонть финансонь дисциплинань топавтоманть лангс. Муниципальной финанстнэнь шумбралгавтомань программанть эйстэ бюджетэнь лезэвчись кармась 630 млн целковойтнеде седе ламо. Сон тешкстызе, седе покш мель эряви явомс инвестициянь тевдеемантень.
«Ошонть туртов редявикс эскельксэсь – экономикань башка зонань теемась. Аволь эрьва прявтошсонть сон ули. Саранскоенть туртов те покш лезкс! Теде башка, ошонь округсонть улить инвестициянь 34 чаво таркат», – тешкстызе Артём Здунов.
Башка мель Мордовиянь Прявтось явсь ули-паронь объекттнэнь инвентаризациянь, административно-территориальной образованиятнень границятнень совавтомань, градостроительной документациянь порядокс ветямонь, модань участкатнень (конантнень коряс арась сиведемань кисэ пандома) сиведемань договортнэнь марто важодемань коряс невтевкстнэнь топавтомантень. «Неть прявт кевкстематнень эйстэ ашти территориятнень весемеендонь виевгавтомась, эрямо таркатнень строямось ды социальной инфраструктурань одкстомтомась. Те ошонь ярмактне, ды те важодеманть эряви топавтомс седе вадрясто», – мерсь Артём Здунов.
Ошонь руководствань ванновтось истя жо явовтозь эрямо таркатнень строямонть, сынст лангс питнетнень ды таркатнень весемеендонь виевгавтоманть лангс. Республикань Прявтось тешкстызе, мелят васенцеде удалась топавтомс вадря динамика республикав кадратнень тердемаст коряс. Эрямонь таркат эрявить те категориянть туртовгак – ломантнень туртов улест рамавиця кавонзазь метрат.
Покш тевть ошонть икеле аштить социальной инфраструктурань одкстомтоманть коряс. «Бизнес-спринт» федеральной проектэнть лувсо республикантень удалась явовтомс 78 млн целковойть 2025 иестэ Саранскойсэ фиджитал-куншкакуронь тееманть туртов. Тедеде прявтошсонть арсеви панжомс 600 таркас школа, прядомс 30 иень история марто куватьс строявиця объектэнть – Коррекционной школанть. Арсематнесэ – 1300 таркас школань строямось (9№ школанть таркас), педе-пев эряви витнемс ошонь 24 школат ды 16 эйдень кужот. Республиканть туртов социальной инфраструктурань прявт объекттнэнь ютксто вейкесь – Республикань онкологиянь диспансерэнь лецямонь корпусось. Сонзэ витнеманть-одкстомтоманть туртов ярмактнень явовтомась – прявт тев.
Артём Здунов тешкстызе: седе эрязасто эряви невтемс прянть федеральной программатнесэ, конат лездыть одкстомтомс коммунальной инфраструктуранть, истя жо важодемс Территориятнень виевгавтомань фондонть марто.
Башка мель явозель коммунальной инфраструктурань азортомо объекттнэнень. Мордовиянь Прявтось кармавтсь прядомс учетс сынст путомань коряс важодеманть 2024 иестэ. Кудотнень перька таркатнень ды социальной объекттнэнень ардомань китнень витнеманть коряс республикасонть кемекстазь – неть тевтнень туртов ярмактне явовить региононь китнень фондстонть. Мелят удалась витнемс 54 объектт. Тедеде ошонь округонь вешемась – 23 участкат.
Башка ванновт ало кармить экологиянь ды природопользованиянь кевкстематне. Истя, уш иень ютазь, 2025 иень 1-це кварталстонть улезэ ливтезь эксплуатациясто ошонь ТКО-нь полигонось. Ве шкане ветявозо важодема сонзэ альтернативань тееманть коряс.
Китнень-транспортонь хозяйствань ды ошонь территориятнень кирдемань енксстонть Мордовиянь Прявтось мерсь: «Муниципалитетэсь – те аволь политической, седе пек – хозяйственной структура. Секскак важодеде неть кевкстематнень коряс, яводо седе покш мель ошонь эрицятнень пшкадематненень».
Ошонь общественной транспортонь важодеманть коряс Артём Здунов тешкстызе, тедеде Саранскоентень явовить автобусонь ды троллейбусонь эште 20 единицат, ансяк эряви явомс мель техникань технической обслуживаниянть, ветницятнень а сатомань кевкстемань витеманть ды маршрутонь сетень оптимизациянть лангс.
Сессиянть прядовомга Мордовиянь Прявтось явшесь наградат.
Мордовия Республикань Прявтонь пресс-службась