Константин Чуйченко евтась сюкпря республикань руководителентень форумонь ютавтоманть кисэ: «Те пек эрявикс история, конань смустезэ уголовно-исполнительной системанть гуманизациясонть. Весемесэ, мезесь сюлмавозь оляс лисемантень, обществасо эрямонтень ломантнень анокстамост марто, васенце таркасо свал ульнесь контролень пельксэсь. Ней, пробациядо закононть примамонзо марто, васенце таркас лиссь гуманитарной пельксэсь. Регионось – пробациянь системань ероков участник, минь нейтяно, цетавкс ули. Сюкпря те кевкстемантень истямо покш мелень явоманть кисэ».
Россиянь Юстициянь министрась евтызе мелензэ изолированной участканть ванноманзо коряс, конась важоди кода исправительной куншкакуро: «Важодемань истямо лувось невти: минь эскелятано виде енкссонть. Топавтови прявт тевесь – од эрямонтень ломантнень анокстамонть вельде рецидивностень киртямось».
Артём Здунов евтась сюкпря Константин Чуйченконень регионъютконь форумсо улеманть, лезксэнть ды Мордовиянь виевгавтомантень мелень явоманть кисэ.
Прявт проектэсь – питневтеме юридической лезксэнь виевгавтомась. Ледстясынек, 2023 иестэ Мордовиясо кармась важодеме Государственной юридической бюро, конань услугатне те иень васенце кото ковтнень перть явозь 195 эрицятненень 385 тевтнень коряс. Весемеде сеедьстэ лезкс мельга пшкалить СВО-нь участниктне ды сынст семиятне. Республикань енкстнэсэ эрязасто ютавтовить выездной мероприятият ды «День участника СВО», виевгавтовить дистанционной лувтне.
Республикань руководителесь домкасто евтнесь исправительной куншкакуронь сетень виевгавтомадонть. Мордовиясо теезь чумондозетнень кармавтомань важодеманть туртов 947 таркат. Арсематнесэ – Рузаевкасо исправительной куншкакуронь теемась (350 чумондозес), уш витезь анокстамонь зярыя кевкстемат.
Константин Чуйченко ды Артём Здунов истя жо кортасть Саранскойсэ «Юстициянь кварталонть» теемадонзо, гражданской состояниянь акттнэнь государственной регистрациянь структуранть виевгавтомадонзо ды лия кевкстематнеде.
Мордовиясо важодемань коряс улемстэ Россиянь Юстициянь министрась истя жо ютавтсь важодемань вастовомат исполнительной властень федеральной органтнэнь подведомственной территориальной органтнэнь, государственной учреждениятнень ды службатнень руководительтнень марто.
Мордовия Республикань Прявтонь пресс-службась