Совавтозь полавтомат Мордовия Республикань Конституциянтень: Госсобраниянтень максовить полномочият Мордовия Республикань Счётной палатань Председателень полавтыцянть ладямонзо ды каямонзо коряс.
Вемельсэ примазь полавтомат «О транспортном налоге» Мордовия Республикань Закононтень ламо эйкакшонь семиятнень ды семиятнень коряс, конатнесэ кастови эйкакш-инвалид. Транспортонь средствань виесь, конань лангс максови льгота транспортонь налогонть коряс истят семиятнесэ тетянтень эли авантень, покшолгавтови 200 алашатнень видьс. Истя жо ванстови правась получамс льгота транспортонь налогонть коряс специальной военной операциянь маштовозь участниктнень семияст туртов.
Правительствань часонть лувсо кортась Мордовиясо Предпринимательтнень праваст ванстомань коряс уполномоченноесь Елена Юрченкова. Сон евтась мель примамс «О семейном предпринимательстве» Мордовия Республикань Закон ды домкалгавтомс Мордовиянь Важодемань династиятнеде положениянть «предприниматель» профессиясонть, истя жо ванномс возможностенть максомс Предпринимательтнень праваст ванстомань коряс уполномоченноентень законодательной инициативань права.
Сессиянть прядовомга Мордовиянь Прявтось Артём Здунов пшкадсь депутаттнэнень, кармавтсь эрязасто важодемс эрицятнень марто республикасонть сэтьмечинь топавтомань кевкстематнень коряс. Истя жо евтась мель ютавтомс нормативной юронь мониторинг ды бути эряви пшкадемс Государственной Думантень миграционной законодательствасо асатыкстнэнь витеманть коряс.
«Миненек эряви видестэ ваномс мигрантнэнь молемаст мельга. А лоткавтомс, а самай ваномс, содамс: кие миненек сы, мезекс. Минь евтатано мель важодемань таркатнень максыцятненень лия мастортнэстэ сыцятнень важодеме саемстэ тердемс экспертт рузонь келень, минек культурань ды лия эрявикс енкстнэнь содамочитненень питнень максоманть туртов. Школатнесэ тонавтыцятненень эряви ютавтомс «Разговоры о важном», а нолдамс раськетнень эли религиятнень ютксо а ладямот. Эсенек невтевксэнть вельде эряви тонавтомс эйкакштнень явомс паронть беряненть эйстэ», – мерсь региононь Прявтось.
Ванновсть лия кевкстематкак.