Мордовиянь Госсобраниянь депутаттнэ пшкадсть Россиянь Правительствань Председателентень Михаил Мишустиннэнь миграционной законодательствань одкстомтомань кевкстеманть коряс. Парламентарийтне домкасто ваннызь омбо масторонь эрицятнень рузонь келень содамост туртов питнень максомантень общественной организациятнень представительтнень тердемань лувонть ды документсэнть тешкстызь мелест-арсемаст.
«Те пек эрявикс кевкстема, Россиянь обществантень омбо масторонь эрицятнень совамось нежедезэ рузонь келентень, историянтень, законтнэнень ды минек масторонь эрямонь лувонтень мелень явоманть лангс», – тешкстызе МР-нь Государственной Собраниянь Председателесь Владимир Чибиркин.
Прявтокс кармась организациятнень ули-парост лангс налогонь коряс законось. Кортамось мольсь деловой ды микшнемань куншкакуротнеде, истя жо тежа кавонзазь метрадо седе покш аволь эрямонь помещениятнеде, косо панжозь офист, лавкат, кафеть, ресторант, мазычинь салонт.
«Ули-паронь объекттнэнь кадастрань питнест покшолгавтоманть пингстэ предпринимательствань субъекттнэнь лангс налогонь нагрузкань сеске кастомань а нолдамонть туртов евтави мель кемекстамс налогонь преференция, конань коряс организациятнень ули-паронть лангс ловнозь налогонь пешксе покшолмась кастови пельксэнь-пелькс. 2024 иестэ налогонь касомась карми 40% аволь седе ламо 2023 иенть коряс, 2025 иестэ - 30% 2024 иенть коряс ды 2026 иестэ - 30% 2025 иенть коряс», – толковизе Мордовиянь Правительствань Председателень полавтыцясь Наталья Таркаева.
Чинь повестканть лувсо ваннозь ламот кевкстематне – социальнойть. Сынст ютксо республикасонть эриця неемань коряс инвалидтнэнень социальной лезксэнь явомась. Депутаттнэнь ушодксонть коряс, конадонть евтнесь МР-нь Госсобраниянь Председателень полавтыцясь Наталья Долматова, эрицятнень те категориянтень эрьва ие кармить пандовомо 15 тежат целковойть, те лезды пекстамс ютавкстнэнь ветиця кискатнень кирдемаст ды ветеринарной обслуживанияст лангс.
«Федеральной закононть коряс кемекстазь инвалидэнть правазо, конань ули ветиця кисказо, ракшанть кирдемань ды ветеринарной обслуживаниянь коряс ютавкстнэнь велявтоманть лангс. Неть ютавкстнэнь компенсациясь пандови РФ-нь Социальной Фондонь бюджетстэ. Тедеде сонзэ покшолмазо 35 тежат целковойть. Мордовиясо ветиця кискатнень кирдемс ютавкстнэнь покшолмась – малав 50 тежат целковойть. Региононь кемекставиця пандомась целанек пекстасынзе кискатнень кирдемаст лангс неемань коряс инвалидтнэнь ютавксост», – толковизе Наталья Долматова.
Парламентарийтнень решенияст коряс ламо эйкакшонь семиятненень мереви республикань авань капиталонь ярмактнень ютавтомс квартирань эли кудонь витнемс. Теде башка, неть ярмактнень лангс истя жо мереви рамамс музыкань инструментт эли оборудования ламо эйкакшонь семиятнестэ эйдетнень туртов, конат яксить музыкальной школатнес.
Сессиясонть ютазь иестэ топавтозь важодемадонть пачтямо марто пшкадсь МР-нь Счётной палатань руководителесь Николай Ларьков, эсь тевдеемадонть пачтямонть яволявтызе Мордовия Республикасо Эйкакштнень праваст коряс Уполномоченноесь Наталья Юткина.
Весемезэ ваннозь чинь повесткань 13 кевкстемат.
Сессиянть прядовомга, Мордовиянь Госсобраниянь Председателесь Владимир Чибиркин евтась поздоровт депутаттнэнень Россиянь парламентаризмань сыця чинть кувалма.
Известия Мордовии