«Минек ютксто ламотнень туртов – те важодицятненень солидарностень кенярксчи! Вейсэндявомань ды паро трудонть кисэ праванть кисэ бороцямонь чи! Течи минь евтатано поздоровт ломантненень, кить эсест ерокчисэст ды бажамосост славить минек Мордовиянть, кемекстыть минек государствань паро эрямонть», – панжизе митингенть МР-нь Профсоюзтнэнь федерациянь председателесь Сергей Борисов.
Сонзэ валонзо коряс, тедеде панжиковонь 1-це чись канды башка смусть.
«Течи невтяно весе минек раськень вейсэндявоманть ды кирдтяно минек Президентэнть Владимир Владимирович Путинэнь те уцяскань полавтыця шкастонть, минек масторонь национальной мельтнень-арсематнень ванстоманть коряс сонзэ бажамонзо. Минь кирдтяно минек военнослужащейтнень, конат специальной военной операциясонть топавтыть боевой тевтнень. Минь весе кортатано – арась нацизмантень!» – тешкстызе Сергей Борисов.
Сон ловнызе Россиянь независимой профсоюзтнэнь федерациянь резолюциянть.
«Россиянь профсоюзтнэ аштить минек обществань вейсэндявомань топавтоманть туртов нежекс. Целанек масторонть ды эрьва важодицянть башка экономиканть лезэс, вадря важодемань таркатнень теемань ды паро зарплатань получамонь туртов вейсэндявомась. Истя ульнесь васенце вете иетнень шкасто, Ине Отечественной войнастонть, 90-це иетнень ушодовомсто.
Истя улезэ течеяк. Профсоюзтнэнь лангсо ашти покш тев – минек обществанть туртов аволь шожда шкастонть вейсэндямс весе важодицятнень од мирэнь строямонть туртов. Вейсэндямонь мирэнть, солидарностень, видечинь мирэнть», – кортави эйсэнзэ.
Митингентень пурнавозетнень ютксо ульнесь Валентина, сон сась Саранскоев Киргизиянь республикастонть. Тейтересь тонавтни Н. П. Огарев лемсэ МГУ-нть архитекторокс. Сон корты, тонавтнемадонть мейле ули бажамозо варчамс теемс Саранскойсэ эйкакшонь площадкань проектт.
Тамара Сазонова ней пенсиясо, ансяк Тундонь ды Трудонь вейкеяк кенярксчись эзь ютавтово сонтемензэ.
«Монь туртов те правила! Панжиковонь 1-це чистэнть мон зярдояк а аштян ве ено, свал стян стройс!» – евтнесь сон.
«Известия Мордовии»