Васенцекс няфтьфоль «Национальная социальная инициатива» ширеть коряс мяльсь-арьсемась. Сон сотф МФЦ-ть функциянзон келептемаснон мархта. МР-нь Оцюнясь китькстазе, што проектть эряфс ётафтомац лезды касфтомс тяфтама ширень кирдемать доступностенц.
Инициативать авторонц – МР-нь Экономикань министерствань административнай реформань отделонь начальникть Елена Семелевать валонзон коряс документтнень нюрьхкяня пингста и цебярь качестваса оформляндамасна сядонга ладяй социальнай ширде апак аралак граждаттненди, конат эряйхть башка райоттнень эса и ичкоздень велеса.
- МФЦ-сь тячи пуромома васта ломаттненди, коса теест ули кода решандамс аф фкя лацонь кизефксснон. Лезнихть синь бизнестивок. Республикасонк эффективнайкс арась МР-нь Многофункциональнай центрать и МР-нь предпринимательхнень ширень кирдемань фондть марстонь работасна, мезть вельде курокста макссеви лезкс самозанятайхненди и ёмла и средняй бизнесонь представительхненди, - азозе Елена Семелева.
Омбоце мяльть-арьсемать автороц Большеберезниковскяй райононь Николаевка велеста Вячеслав Окунев, кона заняф осетровай породань калонь касфнемаса. Республикати экзотическяй бизнесть сон ушедозе 2017 кизоня. Тячи фермаса лувондови 10 тёжяньда лама кал. Синь Вячеслав Окунев мишендьсыне ярмаркаса Саранскяйса и райоттнень эса, сотрудничендай рестораттнень мархта, ладясь мишендема социальнай сетьтнень эса. Калонь фермась – туристтненди нинге фкя пуромома васта. Предпринимательсь ётафни тяса экскурсият, конатнень эзда кенярдихть и оцюфне, и шабатне.
Вячеслав Окунев арьсекшни сянь колга, штоба калсь мишендеволь ошень сембе лавкатнень эса. Тяниень пингть мощносттне тянкса аф сатнихть. Эряви ладямс нинге производственнай цехт, проектть питнец 600 миллионть малава цалковай.
- Проектсь, кона сотф осетровай породань калонь касфнемать мархта, лезды келептемс уликс производствать. Сонь эряфс ётафтомац обеспечендасы ару продукцияса потребительхнень вешфксснон, а стане жа кирдьсы регионца традиционнай калонь промыслать ширенц, - мярьгсь Артём Здунов
Колмоце мяльсь-арьсемась сотф «Предпринимательство» ширеть мархта. Лямбирскяй райононь администрациянь экономическяй управлениянь начальниксь Ирина Пестова азсь мяль кирдемс эряфкшу ломаттнень ширеснон, конат арьсекшнихть панжемс эсь тевснон.
- Тумок пенсияс эряфкшуфне лядондыхть эрьгавкс. Синь лама мяльдост-арьсемадост, а главнайсь опытсь, конань синь пара мяльса анокт пачфтемс лиятненди. Лувондса, што тяфтама ломаттненди эряви макссемс грант лаца финансовай лезкс. Условиятне: эряфонь и профессиональнай опытсь и хуш фкя покодема вастонь панжемась, - отмечазе Ирина Пестова.
МР-нь Оцюнять мяленц коряс, тя лезды ванфтомс ламоц профессиятнень, конат тячи аф сатомшка содафт од ломаттнень ёткса.
Целайнек Мордовия Республикать эзда форумонь кросс-платформать лангса регистрировандафоль 115 мяль-арьсема, конатнень инкса вайгяльснон максозь 7578 ломанць.
isvmor.ru