Заседаниять панжемста Мордовиянь Оцюнясь лятфтась санкциянь условияса странань экономикать кемошинц касфнеманкса од мератнень колга, конатнень тяда инголе азозень Россиянь Президентсь Владимир Путин Правительствань члеттнень мархта совещаниять пингста. Курокста сувафтфтольхть полафткст закоттненди и нормативнай акттненди, конат лисендихть пцтай эрь шиня.
Артём Здунов макссь поручения республикань министерстватненди и ведомстватненди лац-ряц ваномс полафткснень мельге, и эстеестка работамс тяфта жа курокста и парста. Сон мярьгсь, што ётай недялять федеральнай уровеньца аноклафтольхть од антикризиснай предложеният, ламоцнень колга корхтафоль Президентть ширеса совещанияса.
«Тяфта, Россиянь Правительствась азсь мяль мярьгомс граждаттненди и оцю бизнесонь представительхненди, конат сявсть «уенди» (плавающай) процентнай ставка алу кредитт, тиемс реструктуризация тя займатненди. Тя инфармациясь эряви пачфтемс сембе получательхненди – кодама прават получаманкса улихть, кодама каготт тянкса кочкамат, кодама регламенць – тя минь работаньке!» - китькстазе Мордовиянь Оцюнясь.
Стане жа Артём Здунов корхтась строительнай отраслять ширенц кирдеманкса мератнень колга, тяконь лувксса госконтрактть питненц полафтоманц квалма. Тя мерась сувафтфоль тевс ётай кизонь кизоня строительнай материалхнень питнияманкса, и работась 2021 кизоть аделавомс. Тяни механизмась, кона лезни пяшкотькшнемс (компенсировать) застройщикнень дополнительнай карьхцьснон, кувалгофтови 2022 кизоть аделавомс. Тя максы апак лотксек поладомс важнай социальнай и инфраструктурнай объекттнень строямаснон.
Нинге фкя однясь канневи ёмла и средняй бизнесонь представительхненди. Госзаказчикнень мархта кемокстаф договорхнень коряс тяфтама предпринимательхнень услугаснон инкса пандомань инь оцю пингсь 15 рабочай шиста кирьфтаф 7 рабочай шис. Артём Здунов китькстазе, што эряви кемоста пяшкотькшнемс тя срокнень, штоба бизнессь получальхцень ярмакнень сяда курокста и ноляльхцень синь эсь оборотозонза.
Арьсекшневи стане жа кирдемс ёмла и средняй бизнесть ширеснон тяфта лемдеви «офсетнай контракттнень» - региоттнень государственнай вешфксснон обеспечендаманкса товаронь пачфтеманкса госконтракттнень вельде, мзярда каршек ладявихть тя регионца производствать панжеманц коряс инвестиционнай обязательстват.
Мордовия Республикань Оцюнять пресс-службац