26 декабрьста Мордовиянь Оцюнясь Артём Здунов Ардатоваса примась участия Я.Я.Костюченконь лемса «Дельфин» уендемань бассейнать панжемаса. Объектсь строяф «Комплексное развитие сельских территорий» государственнай программать мяльса кирдезь. Мероприятияса ульсть Россиянь Минсельхозть представителенза.
Васенце этажса ащи 25 метрань кувалмоса 4 кинянди бассейнась, душевой кабинет мархта раздевалкась, тренерти и медсестрати комната. Специальнай оборудованиясь максси сашендомс тренировкас ограниченнай возможность мархта ломаттненди. Омбоце этажса — специализированнай тренажёрнай зал, кона максси аноклакшнемс пялькстомас уендихненди. Бассейнаса покодихть 18 ломань. Сменаста объектсь примай 60 ломань, а суткаста — 480.
Учрежденияти максф Яков Яковлевич Костюченконь — греблять коряс СССР-нь спортонь мастерть, Россиянь заслуженнай тренерть, Мордовия Республикань сборнай командань члеттнень тренерснон лемоц. Сон тренировандасы стане жа международнай классонь спортонь мастерть Елена Анюшинать.
Артём Здунов тяшкстазе, што объектсь мезьсовок аф сяда кальдяв столичнай учреждениятнень коряс, а спортсметтненди тячи нльне ичкоздень велесовок ули кода анокламс инь оцю уровенень пялькстоматненди. «Велень территориятнень комплекснайста виияфнемаснон коряс программась, конань арьсезе странань Президентсь Владимир Путин, максси региоттненди стройсемс спортонь тяфтама цебярь дворецт любой муниципалитетса. Ардатоваса ётафневихть олимпийскяй резервань школань тренировкатне, тя бассейнась тяса пяк эрявсь. Азан оцю сюкпря Россиянь Велень хозяйствань министерствати ширень кирдеманкса», - мярьгсь республикань Оцюнясь.
РФ-нь Велень хозяйствань министерствань велень территориянь виияфнемань Департаментть директороц Ксения Шевелкина китькстазе, што строямань программась поладови сяда тов. «Тя программать эряфс ётафтоманц примерса минь няйсаськ, што Мордовиясь фалу пяшкотькшнесыне эсь лангозонза сявф обязательстватнень. Министерствась кармай сяда товга виияфнемост республикань велень территориятнень», - мярьгсь сон.
Торжественнайста панжемда меле бассейнань кинятнень лангс лиссть профессиональнай уендихне и няфтсть мастер-класс. Спортсметтне мярьгсть, што бассейнась отвечай инь оцю вешфксненди, а сяс тяса кармайхть ётафневома аф аньцек тренировкат, но и оцю пялькстомат.
Мордовия Республикань Оцюнять пресс-службац