Анна Мигуновась сась приемс, штоба пачфтемс Кочкурово велень эряйхнень эняльдемаснон Кочкуровскяй средняй школать петеманц колга. Зданиясь строяф 1989 кизоня, петемань кизефкссь появась кунара.
Республикань Оцюнясь пшкядсь кизефкс мархта Галина Лотвановати: кода кармай пяшкотькшневома тя прябалась. Сон мярьгсь: тячиень шиста ушедсь заявкань примамась федеральнай пялькстомати, аноклави объектть коряс документонь пакетсь, проектно-сметнай документациясь ули. Заявкати кармай дабаваф спортивнай составляющайсь – ласькомань кинянь тиемась и спортивнай инвентарень рамамась.
Олеся Паулова Чамзинскяй райононь Киржеманы велеста тожа сась коллективнай энялькс мархта – ФАП-ть ванфтоманц колга. Медицинскяй учреждениять обслуживанияса ащихть тёжяньда лама ломань, синь ётксост школась и идень садсь.
Мордовиянь Оцюнясь мярьгсь, што ФАП-ть реорганизацияц планца аш, сон кармай покодема станяк, ванондовихть сонь виензафтоманц коряс кизефксне. Тяйне специальностень врачне, кода мярьгсь велэряйсь, фалу сашендыхть и тиендихть прием, ломаттненди тянь колга азонкшневи пингта инголе.
Надежда Якшамкина Дубенскяй райононь Ардатово велеста пшкядсь Советскяй ульцяса кинь тиемань эняльксть мархта.
Республикань велень хозяйствань и продовольствиянь Министрсь Антон Илюшкин азозе, што тя кить тиемац животноводческяй комплексти молемс Ардатово велеса кармай сувафтф «Комплексное развитие сельских территорий» государственнай программать планц 2025 кизоть лангс.
Артем Здунов китькстазе: кить мельге ваномать должен сявомс эсь лангозонза сельскохозяйственнай предприятиясь, конань стака транспортоц тапсесы сонь.
Александр Куликов Ромодановскяй райононь Константиновка велеста сась кизефксонь целай списка мархта. Прявкс кизефкссь - Смагина ульцяса кить состояниянц коряс. Ули прябала ТКО-нь контейрхнень ащемаснон коряс. Авардемань состоянияса ащи воиттненди, шавфненди Великай Отечественнай войнаса памятниксь.
Республикань Оцюнясь согласиндась: аф пяшкотьф кизефкста лама. «Тяса эряви комплекснай подход системнай прябалань пяшкодемати, мярьган Правительствати молемс эрь вастти, эрь кизефксть ваномс и пяшкодемс тостоконь эряйхнень мархта марс», - мярьгсь Артем Здунов.
Мордовия Республикань Оцюнять пресс-службац