Мордовиянь Оцюнять мзярошка пингс тевонзон тиендисна Артем Здунов 25 ноябрьста ванозе Саранскяйса педа-пес апак строяк объектть – Тысячелетиянь площадьса Универсальнай залть. Региононь вятись содафтсь работатнень мархта, конат эрявихть пяшкодемс спортивнай сооружениять тевс сувафтоманкса.
Лятфтасаськ, Универсальнай залть строямац ушетфоль 2011 кизоня, тевс сувафтомань пингсь аф весть канневсь одувонди. Строямать питнец кассь, тяни тя 5,5 миллиарттнень малава цалковай. Строительствань, транспортонь и дорожнай хозяйствань министрть Виктор Цыгановонь валонзон коряс тячиень шити Универсальнай залть зданияц анок 84 процентта.
Артем Здунов ванозе объектть эса основной строительно-монтажнай работатнень пяшкодемаснон, макссь ответственнайхненди тевс сувафтомань пингть коряс конкретнай кизефкст, шарфтомок башка мяль тяка пингть маластонь территориять эса парковочнай васттнень аф сатнемаснон лангс.
Саранскяень мэрсь Петр Тултаев азозе, што генпланть полафтомац вятсь сянди, што проектть васенце вариантонц эса арьсеф парковочнай васттнень (Л.Толстоень ульцяса) вастса эвондасть мишендемань площатть. «Парковочнай васттнень эса тяса вешфкс ашель, а вов мишендемань павильеттне макссихть рабочай вастт», - мярьгсь градоначальниксь.
Мишендемань площаттнень ваномста содафоль, што ламотне еткстост ащекшнихть шавоста или селкфт. Артем Здунов макссь поручения Минстроень вятити и ошень администрацияти 3-4 шиста арьсемс-азомс Универсальнай залть маласта сатомшка парковочнай вастонь панжемать коряс мерат. «Кода минь карматама етафнема тяса международнай пялькстомат, конат вешихть парковкат ваныхненди и участникненди, спецтехникати, скорай помощти, правопорядкань вийхненди?» - талакодсь Мордовиянь Оцюнять мзяршка пингс тевонзон тиендисна.
Лятфтасаськ, Универсальнай залсь – лама функциянь спортивнай сооружения, кона арьсеф спортонь аф фкя лацонь виттненди: ледовай аренать ули кода тиемс волейбольнай, баскетбольнай пялькстомань, культурно-спортивнай мероприятиянь, концертонь етафтоманкса . Стане жа тяса улихть тренажернай, хореографическяй и гимнастическяй залхт, медико-восстановительнай центра.
Мордовия Республикань Оцюнять пресс-службац