Пялькстомать задачанза – аф аньцек кирдемс семиянь питнишитнень, но и марстоптомс эрь кодама поколениянь представительхнень эсь семияснон и странаснон ваксс. Мордовия Республикась васенце этапса занясь 1 вастть Россияса пялькстомати заявкань максомань коэффициентть коряс и сувась топ-30 регионовти участниконь абсолютнай лувксть коряс.
Республикать эзда пялькстомаса примасть участия 1305 семия – тя пцтай 7400 ломань. Окружной полуфиналти ётасть 8 семия. Испытаниянь результаттнень коряс Курышкиттнень семиясна ётась финалти.
13 июньста Мордовиянь Оцюнясь васьфтьсь финалисттнень мархта - Курышкиттнень семияснон Рузаевкаста и полуфиналисттнень - Никишиттнень Саранскяйста.
«Мон пара мяльса шумбракстсайне «Россия – страна возможностей» эхянь содаф президенскяй платформань пялькстомать полуфиналистонзон и финалистонзон, - мярьгсь Артём Здунов, васьфтемать панжемста. – Кода теентть пялькстомась, мес срхкаде примамс участия?»
«Минь сюконятама Россиянь Президентти, сюконямок конанцты тя пялькстомась ули, - мярьгсь Екатерина Никишина. - Тейть, Артём Алексеевич, тожа оцю сюкпря демографиянь кизефкснень кирдеманкса. Пялькстомать колга ульсь информация школаса и идень садса, и минь максоме заявка».
Михаил и Екатерина Никишиттнень – ниле идьсна, Михаил Михайлович покоди госслужбаса. Мархтост пялькстомаса примасть участия бабасна и атясна – математиконь-педагогонь оцю династиянь представительхне. Курышкиттнень – колма идьсна, пялькстомаса теест тожа лездсть бабасна и атясна. Пцтай сембе семиянь представительхне покодихть «РМ Рейл» компанияса.
«Минь пяк эрязтама и дружнайхтяма, сяс и сръхкаме пялькстомати. Тейнек ульсь аф стака, сяс мес семботь тиендеськ марса, - азондозе Гюльнара Курышкина. – Пялькстомась пяк цебярь, теняра эмоция получаме! Сембонди советовондан примамс эсонза участия, сон марстопни!» Инголе Курышкиттнень - прявкс испытаниясна: финалсь, конац ётай Москуса.
А республикаса появай региональнай Семейнай совет – тя Михаил Никишинонь инициативанц кирдезе Артём Здунов.
Мордовия Республикань Оцюнять пресс-службац