Тяфта, Правительствань Председательсь кемокстась постановления, конань мяльс сявондезь канневи 2022 кизонь 1 декабрти фермерскяй хозяйстватненди и велень хозяйствань кооператифненди лофцонь продукциять маркировкань обязательнай этапть маркировканц ушедоманц, а стане жа обязанность кучсемс информация маркировкань мониторингонь системав организациятненди, конат рамсихть лофцонь продукция и ведь эсь и или производствань вешфкснень пяшкодеманкса.
Стане жа Правительствась примась решения келептемс госзакупкатнень мархта работай бизнесть ширень кирдеманц. Штоба предпринимательхне сяда курокста получалезь тядде кемокстаф контракттнень коряс оборотнай средстватнень, авансированиянь объёмсь касфтф 50 процентс марстонь пандомать лувксонц эзда, кда средстватне туйхть казначейскяй сопровожденияфтома.
«Россиянь Президентть поручениянзон мяльс сявондезь ладяф «Льготная ипотека» программать коряс инь оцю ставкась – 12 процент кизоти. Лятфтаса стане жа, што сяда тов работай 6 процент алу семейнай ипотекась и 3 процент алу велень ипотекась. Тя лезды тейнек аф лоткафнемс программатнень, а келепнемс синь», - мярьгсь Артём Здунов. Башка мяль шарфтфоль населениять заняфшинцты. Башка работникнень ширень кирдемаснонды, конат ащихть пельксонь группаса. Кой-кона предприятиятне азсть анокши нолдамс тевс гослезксть, кда эвондайхть лоткамат занятость эса, водендам ломаттнень аф лама пингонь работатненди, тонафнемс синь одукс. Тянкса нолдавихть федеральнай средстват – 179 миллион цалковай. Артём Здунов мярьгсь, што Мордовияти ули кода надиямс тя сфераса дополнительнай финансирования лангс. Муниципальнай райононь оцюнятненди мярькфоль лацкас ваномс аф лама пингонь рабочай вийса вешфкснень.
МР-нь экономикань, торговлянь и предпринимательствань министрсь Алексей Грибанов азондсь республикаса ширень кирдемань федеральнай и региональнай мератнень эряфс сувафнемаснон колга, а стане жа предложениятнень квалма, конат прважафт федеральнай центрав ёмла и средняй предпринимательствань субъекттнень государствать ширень кирдемань мератненди доступностьснон касфнеманкса.
Питнетнень и товаронь запасть улеманц мониторингсна мольфтеви эрь шиня. Мишендемань сетьтнень эса сембось ули. «Ётай недялять песта сявомок ушедсь кирема сахарти, салти и ямксненди оцю вешфкссь. Виде, ётай недялять кассть «борщевой наборста» продукцияти питнетне. Васендакиге тяфта тиевсь федеральнай сетень магазиттнень эса. Тяса питниясь васендакиге импортнай капстась, тя ся пингть, мзярда «Тепличное» лавкаса килограммать питнец 60 цалковайда аф сяда лама», - азозе Алексей Грибанов.
Республикань велень хозяйствань предприятиятне стане жа работайхть стабильнайста, мольфтеви продукциять производстванц касфнемац. Мордовиянь велень хозяйствань и продовольствиянь министрсь Александр Кечайкин азозе, што ваймама шинь ярмаркатне няфтезь – товаронь основной группатненди оцю вешфкс аш. «Ёткшинь ярмаркаса 60 тоннат пачфтьф сахарть эзда мифоль аньцек 27 тонна, 180 тёжянь алть эзда – 52 тёжянць. Тяфта жа и тувонь сивольть мархта. Тястонь товаропроизводительхнень сетевой лавкасна мишендьсазь продукцияснон нолдави питнес коре», - азозе министрсь. Штабть работанц шумордамста Артём Здунов шарфтсь мяль федеральнай проекттнень эса, конат сотфт сембе ширетнень коряс антикризиснай мератнень мархта, регионть участвондаманцты.
Мордовия Республикань Оцюнять пресс-службац