29 сентябрьста Саранскяйса МР-нь сисемце созывонь Государственнай Собраниять васенце сессиянц пингста Мордовия Республикань Оцюнянь вастти арафтф Артём Алексеевич Здунов.
Тя пуромксса улеманкса республиказонк сашендсть Приволжскяй федеральнай округса Россиянь Президентть полномочнай представителец Игорь Комаров, РФ-нь сенаторхне Сергей Аренин и Сергей Кисляк, РФ-нь Госдумань депутаттне, Пензенскяй областень губернаторсь Олег Мельниченко, Татарстан республикань, Саратовскяй и Ульяновскяй областень делегациятне, мокшэрзянь землячествань представительхне 8 регионцта, а стане жа содаф общественнай деятельхне и спортсметтне.
Кочкамань итокнень азозень МР-нь Центральнай избирательнай комиссиять оцюняц Александр Косов. Артём Здунов сяськсь, кочкамок вайгяльхнень 78,26 процентснон. Мордовия Республикань Оцюнять пингта инголе кочкамасна лувфт видексоннекс.
Артём Алексеевич макссь присяга народти, РФ-нь Конституцияти и МР-нь Коснтитуцияти: «Максан вал Мордовия Республикань Оцюнять тевонзон пяшкотькшнемста ванфнемс ломаттнень праваснон и воляшиснон, сявондемс мяльс Российскяй Федерациянь Конституциять, федеральнай закоттнень, Мордовия Республикань Конституциять, Мордовия Республикань закоттнень, совестьс коре пяшкотькшнемс лангозон путневи обязанносттнень, вернайста служамс Российскяй Федерациянь народти».
РФ-нь Конституциять и МР-нь Конституциять мяльс сявондезь Артём Алексеевич Здунов арафтф Мордовия Республикань Оцюнянь вастти.
Сонь поздравляндазе Приволжскяй федеральнай округса Россиянь Президентть полномочнай представителец Игорь Комаров.
«Кельгома Артём Алексеевич, поздравляндате Тонь Мордовия Республикань Оцюнянь вастти арафтомацень мархта. Тонь оцю профессионализмаце, эрьгяце и работамшкаце макссть нюрьхкяня пингста сатомс региононь эряйхнень ламошкаснон доверияснон. Кеман, што аф фкя лацонь регионца покодемань опытце, а стане жа сатфксонь сатнемати венемомаце лездыхть сатомс оцю сатфкст Мордовиять виияфнемаса. Тяса аф ёмла промышленнай уликсшись, тяниень пингонь оцю технологиянь велень хозяйствась, виияфтф социальнай сферась. Лац-ряц арьсеф тефне лездыхть нолдамс тя уликсшить ломаттнень эряфснон цебярьгофнеманкса. Властень оргаттнень фкя инь васенце задачасна сатомс тянь маластонь 5 кизотнень. Вийхнень ламошкасна водендамат РФ-нь Президентть мархта путф задачатнень пяшкотькшнеманкса, тяконь лувксса национальнай проекттнень эряфс ётафнемаснон коряс. 17 сентябрьста Владимир Путин макссь порученият Мордовиять социальнай и экономическяй виияфнеманкса. Синь пяшкодемасна лезды кирьфтамс республикать государственнай шумонц, панжи од кит-ятт экономикань реальнай секторть виияфнеманкса. Ломаттнень эряфснон цебярьгофнеманкса эряви, штоба властень оргаттне, федеральнай структурань представительхне, региононь вятихне и местнай самоуправлениясь покодельхть фкя результатонь сатоманкса. Мялезе арьсемс Тееть, Артём Алексеевич, сатфкст од вастса, а Мордовияти – касондомс-вииякшнемс», - мярьгсь Игорь Комаров.
Российскяй Федерациянь сенаторсь, Федерациянь Советонь международнай тефнень коряс комитетть оцюнянц васенце полафтыец Сергей Кисляк китькстазе, што теенза оцю честь улемс тя пуромксса. Сон лувозе РФ-нь Федерациянь Советть оцюнянц Валентина Матвиенкоть приветственнай адресонц.
«Тейть сави пяшкотькшнемс стака задачат Мордовиять сембе ширде виияфнеманкса. Кеман, эрьгяце и трудендама маштомошице лездыхть лац вятемс тефнень государственнай тя оцю вастса», - корхтавсь сёрмать эса.
Безопасностть и коррупцияти каршек ащемать коряс комитетть оцюняц Василий Пискарёв РФ-нь Госдумань депутаттнень эзда китькстазе: кочкамань итокне няфтезь региононь кочкаф Оцюнять авторитетонц. «Кочкайхне кирдезь сявф курсть ширенц. Минь няеськ ни тонь покодемацень. Тон сявоть оцюдонга оцю ответственностть регионть сай пингонц инкса. Кеман, тя кизотне арайхть оцю полафтксонь пингокс. Минь сембоса карматама лезнема», - мярьгсь депутатсь.
Артём Здуновонь Мордовиянь Оцюнянь вастти сувафтоманц мархта поздравляндамонза сашендсь Пензань аймаконь губернаторсь Олег Мельниченко. «Мордовияда мала шабра тейнек аш. Минь фалу эряме ладязь, най лезнеме фкя-фкянди. Тяфта ульсь лама кемотть киза. Сотксоньконь карматама кемокснемост», - мярьгсь губернаторсь.
Мордовиянь почётнай гражданинць Эвир Боксимер шарфтсь мяль: Мордовиянь Оцюнянь вастти саманц мархта Артём Здунов панчсь од лопаня эсь историясонза. «Республикань Оцюнясь пяшксе вийда-эрьгада. Сон ётась цебярь школа аф фкя лацонь должностьса покодемстонза», - китькстазе сон.
Залу пуромфнень инголе корхтамста Артём Здунов азсь сюконямань валхт республикань сембе эряйхненди и странань вятихненди лангозонза надиямань путнеманкса. «Мялезе башка сюконямс Россиянь Президентти Владимир Владимирович Путинонди довериянкса. Мордовия Республикань Оцюнянь вастти арамась – тя оцю честь и ответственность, васендакиге, региононь эряйхнень инголе», - мярьгсь Артём Алексеевич.
«Ломаттнень эряфснон цебярьгофнемац, республикань экономикать кемокснемац – вов мезть лангс шарфтови башка оцю мяль. Фкя инь васенцесь тячи – пуропнемс марс обществать. Тейнек пяк питни федеральнай центрать лезксоц. Карматама покодема регионть социальнай и экономическяй виияфнеманкса. Ётась кизода кржа, и минь мрдафтоськ Россиянь Минфинть довериянц. Госшумоть пандоманц коряс арьсеманьке ушедсть ётафневома эряфс. Максф Мордовиять виияфнеманкса индивидуальнай программать коряс РФ-нь Президентть порученияц. Республикав мртцихть инь цебярь кадратне. Минь мархтонт ётафтоськ «Монь Мордовиязе» конкурсть, цебярьгофнесаськ регионца инвестициятнень мархта сотф тефнень», - азозе Мордовиянь Оцюнясь.
«Сятненди, кие нинге педа-пес ашезе шарьхкоде, мезе тиендеви, кие эсь интересонзон пяшкодеманкса тяряфни ащемс каршек республикать интересонзонды, кие арась кельготнемань и коррупциянь кить лангс, мон лятфнеса: тинь цебярь эряфонте ладявсь ломанень лама поколениятнень трудснон вельде. Сяс вешфкссь кармай оцю. А кизефкста мзярс сяда лама каршек валхнень коряс. Пяшкотькшнемс синь марса тейне мярьгсь Россиянь Президентсь. Тя ответственностть тейне максозь ломаттне, сяс покодема карматама панжадоста. Шкаень лезксть вельде! Аньцек марса и аньцек инголи! Сюкпря!», - пшкядсь пуромфненди Мордовиянь Оцюнясь Артём Здунов.
МР-нь Государственнай Собраниять сесиянц тянь мархта шумордафоль. Камернай хорсь моразе Мордовия Республикань гимнать.
Мордовия Республикань Оцюнять пресс-службац