Мордовиянь Оцюнять аф лама пингс тевонзон тиендисна Артём Здунов 14 майста етафтсь рабочай васедема Мордовскяй (мокшень и эрзянь) народть Межрегиональнай общественнай организациянц председателенц Юрий Мишанинонь мархта. Корхтамась мольфтевсь мокшэрзянь культурать ванфнеманц колга. Рабочай васедемать пингста региононь вятись примась решения анокламс мокшэрзянь народть культуранц виияфнеманц коряс республиканскяй программа. Тячиень шис, кода тя афоль дивандафта, тяфтама программа ашель. Башка программань примамась максы ванфтомс национальнай койхнень-обуцятнень, максомс тя работати од эрьгя.
«Этнокультурнай козяшить ванфнемац и российскяй нациять марстоньшинц ванфнемасна – государственнай политикань фкя инь важнай задачась. Лангсонк ащи ответственность мокшэрзянь культурать, кяльть, койхнень-обуцятнень ванфнеманкса. Мзярс тя сембось эряй – ули кода мярьгомс, што народсь эряй, што сон ванфнесы эсь лацоньшинц, што сон касонды-вииякшни», - мярьгсь Артём Здунов.
Стане жа васедемаса корхтафоль мокшэрзянь кяльхнень тонафнемаснон, Мордовскяй (мокшень и эрзянь) народть Межрегиональнай общественнай организациять региоттнень мархта, коса компактнайста эряйхть мокшэрзятне, марстонь работанц колга. Юрий Мишанин спасибась республикань вятити организациять исполкомонц заседаниясонза участиянь примаманкса, кона ульсь мартста, азондсь мероприятиятнень колга, конат арьсефт етафтомс тядде.
Мордовия Республикань Оцюнять пресс-службац