Артём Здунов: «Эряви обеспечендамс ломаттненди лямбе кудсост, синь пандыхть тянкса ярмак!»

Артём Здунов: «Эряви обеспечендамс ломаттненди лямбе кудсост, синь пандыхть тянкса ярмак!»

Топливно-энергетическяй комплексонь, ЖКХ-нь объекттнень и электросвязень сетьтнень эса авариятнень машфтомань кизефкснень коряс оперативнай штабть заседаниясонза, кона ульсь Республикань Кудса 12 январьста, башка мяль Мордовиянь Оцюнять аф лама пингс тевонзон тиендисна шарфтсь сянди, штоба сембе службатне курокста сявонделезь мяльс ломаттнень обращенияснон. «Ломаттне тяшнихть сембе адресненди, тяконь лувксса и монь аккаунтозон. Синь пеняцяйхть, што ответственнай лицатне сидеста мезевок аф тиендихть пачфтьф прябалать машфтоманкса. Ломаттне серматкшнихть несколькаксть! Ваность тя обращениятнень и максода ответт».

Республикань Оцюнясь максозень тя обращениятнень штабти и башка китькстазе: «Ванода ситуациять мельге, штоба афоль уле тяфта: ломаттне сермадыхть, а ответсь, кона теест сашенды, кодавок аф сотф прябалать мархта. Сяс мес минь работаньконь мекольце итогоц – тя аф авариять машфтомс, а штоба куттнень эса улель лямбе. Ломаттне рамсесазь лямботь, услугать, теест эряви нормальнай лямбе куттнень эса. Тяни малаткшнихть кельмотне – мезе кармай квартиратнень эса, коса кельме ни эста, мзярда ульцяса аньцек – 5 градус?»

Заседаниять пингста ванфтольхть сембе кизефксне сянь коряс, штоба республикань марнек объекттне, башка социальнайхне, улельхть обеспечендафт сембе ресурснень мархта уштомань сезонть етафтоманкса.

МР-нь Правительствать Председателенц заместителец – ЖКХ-нь, энергетикань и населениять гражданскяй араламанц коряс министрсь Игорь Чадов эсь выступлениясонза пачфтсь ся работать колга, кона мольфтеви чрезвычайнай ситуациятнень пингста марстонь работать ладяманкса: «Кда киньге муниципалитеттнень эса аф сатомшка эсь ресурстост, эряви, штоба соглашениятнень эса улель шарьхкодевиста тяштьф аварийнай ситуациятнень эвондамста сембе службатнень и муниципалитеттнень оперативнай взаимодействиясна. Тяни минь активнайста работатама тянь коряс».

Артём Здунов нинге весть китькстазе подготовительнай работать значениянц. «Минь тяниень пингть машфнесаськ ся последствиятнень, конат лиссть уштомань пингти аф сатомшка лац анокламанкса. И тяни ни эряви ушедомс аноклама сай сезонти, штоба эсь пингстонза мумс пелькс васттнень, а кда эрявксты, курокста машфтомс синь».

 

Мордовия Республикань Оцюнять пресс-службац