Мордовиянь Оцюнять аф лама пингс тевонзон тиендисна Артём Здунов 13 майста етафтсь совещания Правительствань члеттнень мархта трудонь рынкать виияфнеманц и занятостень центратнень работаснон коряс. Ситуациять коряс доклад мархта выступандась МР-нь социальнай защитань, трудть и населениять занятостенц коряс министрть тевонзон тиендисна Игорь Князьков. Марстонь безработицать уровенец тяддень васенце кварталть ульсь 5,5 процент, (РФ-са – 5,6 процент, ПФО-са – 4,9 процент). 1 майти населениять занятостенц коряс центратнень эса кемокстаф 5400 работафтома ломань, пиковай значениятнень коряс (2020 кизонь октябрсь) работафтома лятфнень лувкссна кирсь 63,6 процентта.
Работань максыхнень мархта азф вакансиятнень колга сведениятнень занятостень центратне эрь шиня лихнесазь «Работа в России» порталти, кона ащи Трудть и занятостть коряс Федеральнай службань федеральнай государственнай информационнай системакс. Порталсь обеспечендакшни доступ странань сембе региоттнень эса уликс вакансиятнень общероссийскяй базазост. Эрь кизоня населениять занятостенц коряс центратненди республикань работань максыхне лихнихть пцтай 70 тежянь вакансия, синь структурасост оцюшка талекась рабочай специальносттнень коряс.
2020 кизонь уровенти заняф населениять лувксонц пачфтеманкса Мордовия Республикаса примафт мерат. Но Мордовиянь Оцюнять аф лама пингс тевонзон тиендисна азозе вятеви работать аф сатомшкакс. Статистикань федеральнай службать мониторингоц, кона аноклаф Трудонь Международнай организациять методологиянц мяльс сявондезь, максси сяда оцю цифрат безработицать коряс – 23 тежянь ломань.
«Тя ломаттненди эряви государствать ширень кирдемац, кода минь синь мархтост работатама? – тя кизефксть республикань вятись максозе Игорь Князьковонди. – Мезе тиендихть занятостень центратне, штоба безработицась кирель? Тейне пшкятькшнихть работань максыхне, синь аф мушендыхть ломатть эсь производстваснонды, тяка пингть занятостень центратне етафнихть переобучения, но ули-аш вешфкс тя профессиятненди трудонь рынкаса?»
Артём Здунов макссь поручения тиемс крхка анализ безработицати, тонафнемс опытснон региоттнень, конат эффективнайста работайхть населениять занятостенц коряс.
Мордовия Республикань Оцюнять пресс-службац