Лятфтасаськ, што рабочай группать заседанияса башка мяль шарфтфоль образовательнай организациятнень эса цебярь качествань ярхцамбяльса андомати и капитальнай ремонтонь тиемати, тяконь лувксса школьнай пищеблокнень одкстоптомста инфраструктурать грамотнайста арьсеманцты.
Тядде Мордовиянь 12 школатнень ёткста, конат участвондайхть капремонтонь программать эса, пищеблокне одкстоптовихть 8-тне. Странань сембе субъекттнень эса пищеблокне одкстоптовихть школьникнень-программань участникнень 60 процентсост – тя пцтай 1,3 школа. Васедемать пингста стане жа корхтафоль ёмла классонь тонафнихнень питнефтома пси ярхцамбяльса андомаснон коряс президентскяй проектть эряфс ётафтоманц колга.
Республикань Оцюнясь и Владимир Чернигов корхтасть Мордовияса школьникнень андомань кизефкснень коряс II Всероссийскяй родительскяй форумть ётафтоманц колга. Сон кармай 18 и 19 августста и арай «Мир возможностей» проектти пяльксокс.
Васенце форумсь, кона ётафтофвсь 2021 кизоня, ульсь пяк результативнайкс: эсонза очнайста примасть участия странань 20 регионць, а стане жа регистрировандафоль пцтай 5 тёжятть онлайн-подключения. Школьникнень андомаснон коряс кизефксне ванфтольхть пленарнай заседаниять пингста, экспертнай сессиятнень и дискуссионнай площадкатнень мяльса кирдезь. Кой-кона инициативатнень ширеснон, конат азфтольхть форумса, кирдезь ламотне.
Кепотьксонди, «Здоровое питание школьника» всероссийскяй акцияти поладсь пцтай 7 тёжятть школа 72 субъектста. Мордовиясь, Тывась и Тамбовскяй областсь арасть лидеркс активностьс коре 10 инь цебярь региоттнень ёткса – тяса школатнень-участникнень лувксса мала 100 процентти.
Мордовиянь Оцюнясь отмечазе, што республикаса фалу мольфтеви школаса андомать мельге ванома, тяконь лувксса медиа пространстваса и соцсетьтнень эса. Апрельста Мордовиянь Регионть мархта управлениянь центрась ётафтсь социалогическяй исследования 2 тёжяньда лама ломанть ёткса сянкса, штоба содамс мялезост-аф школатнень и идень саттнень эса шабатнень андомасна.
Школьникнень тядяснон-аляснон ламошкасна – тя 71 процентсь, лувондсазь ярхцамбяльть шумбракс, 66 процентсь лувондсазь аф кальдявкс школьнай столовайхнень санитарнай состоянияснон, а 63 процентсь отмечазь, што синь шабаснон мялезост кода андсазь школаса. Кизефневихне стане жа азсть мяльхть, конат лездыхть цебярьгофтомс школьникнень андомаснон.
Тяда башка, Огарёвонь лемса МГУ-нь «Диетологиянь и нутрициологиянь» кафедарань специалисттне марса Россиянь педиатронь союзть мархта нолдасазь тевс иттнень пищевой статусснон исследовандаманц коряс проектть. Сон лезды цебярьгофтомс аноклави ярхцамбяльхнень рецептснон.
Васедемать пингста Артём Здунов и Владимир Чернигов корхтасть стане жа шумбрашинь кемоксни лагерьхнень видеса всероссийскяй акциянь лидерхненди специализированнай сменань ётафтомать колга.
Мордовия Республикань Оцюнять пресс-службац