Мордовиянь Оцюнять аф лама пингс тевонзон тиендисна Артём Здунов 21 январьста етафтсь ки лангонь движениянь правилатнень колсемаснон фотовидеофиксацияснон коряс комплексса республикань автомобильнай кинь участкатнень оборудованияснон коряс очередной совещания. Лятфтасаськ, декабрь ковть песта региононь вятись путсь задача правительствать инголе ковоньберьф эреклафтомс комплекснень работаснон. Эста фотовидеофиксациянь 207 комплексть еткста, конат ладяфт республикать территорияса, работасть аньцек 94-сь, а ГИБДД-в административнай правонарушениять колга постановлениять анокламанкса материалхне поступакшнесть аньцек 35 комплексть эзда.
Сянь колга, мезе тиф тя пингста, пачфтсь республикань информатизациянь и связень министрсь Игорь Вольфсон. Сонь информациянц коряс, тяниень пингть эреклафтф фотовидеофиксациянь 186 комплексть работасна, ГИБДД-в фотовидеофиксациянь материалхне пачфневихть 111 комплексть эзда, а постановлениятне лихневихть 66 комплексста. Игорь Вольфсон азозе, што ППД-нь нарушениятнень мушендомаснон коряс региональнай системать работац педа-пес ули эреклафтф февраль ковть пенцты. Артём Здунов макссь поручения ся пингти касфтомс республикань китнень лангса фотовидеофиксациянь системать эффективностенц 100 процентс. Тяка пингть мяльс сявомат стационарнай комплекснонь ладяма вастснон, фотовидеофиксациянь дополнительнай передвижной комплексонь ладямать коряс МР-нь УГИБДД-ть предложениянза.
Республикань Оцюнять аф лама пингс тевонзон тиендисна китькстазе, што эряви ладямс тняра комплекс, мзяра мярьгонди ГИБДД-сь: «ГИБДД-сь тиенди анализ аварийностти, вяти учет и мушендсыне ся васттнень, коса ПДД-не эвондакшнихть сяда сидеста, эрьда карматама сявондемост мяльс тя цифратнень. Кда, кирдемок мяльса тя анализть, кизонда эряви поладомс тялонда работай 25 передвижной комплексти нинге тняра жа – тя эстокиге тиема! Лятфнеса – корхтамась мольфтеви ломаттнень шумбрашиснон и эряфснон колга!»
Тяда башка, республикань вятись макссь поручения межведомственнай взаимодействиять рамкаса ладямс ПДД-нь административнай колсемаснон колга лихтьф постановлениятнень Госуслугань порталса ломаттнень «личнай кабинетснон» вельде. «Етафнеда информационно-разъяснительнай работа, кирьфтасть ПДД-нь колсихненди лихтьф постановлениятнень пачфнемань пингснон цифровой платформатнень вельде», - мярьгсь Артём Здунов МР-нь информатизациянь и связень министрти Игорь Вольфсононди.
Мордовия Республикань Оцюнять пресс-службац