Шабатненди кизонь ваймосемать ладяманц коряс кизефксне ванондовсть тячи, 7 апрельста, Мордовиянь Оцюнять аф лама пингс тевонзон тиендиснон Артём Здуновонь ширеса етафтф совещаниять пингста. Мзярс региононь вятись лувондсы пяшкотьф работать аф сатомшкакс. Тя важнай ширесь веши сядонга лац аноклама, башка сянь эса, мезсь сотнеф иттнень ваймосемаснон безопасностенц мархта.
Кода азозе МР-нь Правительствать Председателенц заместителенц тевонзон тиендисна Галина Лотванова, тядде арьсеф пуроптомс 337 лагерь, 22 конатнень еткста стационарнайхть (санаторийхнень видеса), и 315 лагерсь, коса шабатне ащихть аньцек шитемба, синь пуроптфт образовательнай организациятнень и социальнай учреждениятнень видеса. Тяка пингть правительствань зампредсь азозе, што 23 лагерсь, конат работасть тяда инголе, тяни аф работайхть, сяс мес вельф таштомсь инфраструктурасна, хуш ащихть синь пяк мазы вастса.
Учендови, што кизонда лагерьхнень эса ваймосема кармай 20 тежянть малава шаба, тяконь лувксса 8 тежяньда лама стирня-цераня, конат повсть эряфонь палас. Стане жа улихть пуроптфт специальнай сменат уроз-иттненди, инвалиттненди, интернатонь воспитанникненди, спортсметтненди, активисттненди, подросткатненди, конат ащихть профилактическяй учетса. Целайнек тянкса республиканскяй бюджетса катф 250 миллионда лама цалковай. Тяда башка, республикань правительствать мархта кемокстафт договорхт Мордовиянь иттнень федеральнай оздоровительнай лагерьхнень эса ваймосеманкса – «Артекса», «Орленокса», «Сменаса». Мордовияса ули аноклаф 1700 воспитатель и тежяньда лама вожатай.
МР-нь Роспотребнадзорть Управлениянц вятиенц Татьяна Харитоновать информациянц коряс, тядде кизонь ваймосемась шабатненди етафтови кой-кодама ограничения мархта, сявондемок мяльс эпидемиологическяй обстановкать. Лагерьхне улихть пяшкотьфт 75 процентта.
Артём Здунов макссь порученият, конат сотфт иттнень кизонь пингть ваймосемаснонды анокламатнень мархта. «Васендакиге, эряви лац-ряц анокламс сембе инфраструктурать – пищеблокнень, эряма васттнень. Ваность, штоба лагерьхненди улель кода лац пачкодемс транспортса», - китькстазе Артём Здунов и надияфтсь, што обязательна ванцыне кизонь лагерьхнень лична. Стане жа республикань вятись макссь поручения шарфтомс башка мяль содержательнай программать лангс. «Ваймосемась должен улемс мялень салай и полезнай. Тернесть содаф ломаттнень – разнай тевса заняфнень, шабатне должетт корхнемс эсь профессиясост инь цебярьхнень мархта, и сменать пингста шабась должен тонадомс фкя-кафта кемпетенция. Кепотьксонди, тонадомс максома васенце медицинскяй лезксть, аноклакшнемс презентацият, тонадомс выступандакшнемс ломань ломаттнень инголе, тиемс мезевок эсь кядьсост». Стане жа Артём Здунов кошардсь поладомс кизонь ваймосемать анокламанцты Мордовскяй госуниверситетть: «Тоса пуроптфт педагогическяй и студенческяй отрядонь вийхне, синь эрявихть нолдамс тевс обязательна».
Башка Мордовиянь Оцюнять аф лама пингс тевонзон тиендисна лоткась идень ваймосемать безопасностенц мархта сотф кизефкснень лангс. Ответственнай лицатненди максф поручения лацкас арьсемс малаткшни кизонь кампаниять коряс, кафта недяляда меле Артём Здунов кулхцонтсы мекольдень отчетть.
Мордовия Республикань Оцюнять пресс-службац