Мордовиянь Оцюнять аф лама пингс тевонзон тиендисна Артём Здунов 23 июльста рабочай визит мархта ульсь «Электровыпрямитель» ПАО-са, коса содафтсь предприятиять производственнай возможностензон мархта и примась участия торжественнай мероприятияса, кона лемтьфоль заводть 80 кизонь топодеманцты.
Пара история мархта предприятиясь, кона панчфоль странати 1941 кизоня, Великай Отечественнай войнать ушедомста, ащи силовой электроникань и синь видесост преобразовательнай устройствань основной разработчикокс Россияса и СНГ-нь странатнень эса. 80 кизоста сон ашезе юмафта производственнай и научнай потенциалонц, касонды-вииякшни и старандай аськолямс пингть мархта ряцок. «Электровыпрямительсь» - республикань фкя инь оцю заводсь: тяса работайхть 2,5 тежяньда лама ломань.
Мордовиянь Оцюнять аф лама пингс тевонзон тиендисна китькстазе, што предприятиять козя историяц, научно-производственнай койхнень-обуцятнень поколенияста поколенияс пачфнемасна ащихть юркс сяда товолдонь касондомати-вииякшнемати.
«Мирсь аф ащекшни фкя вастса. Тинь содасасть, кода полафнихть мишендемань рынкатне, мезе тиендеви силовой электроникань рынкаса. Но мон кеман, предприятиясь аф ляды ширеса. Аф стак тинь улихть Трудовой Якстерь Знамянь кафта орденонте – получамс синь ульсь пяк стака и почетна. Тя качествань афкуксонь знак, - мярьгсь Артём Здунов. – Тячи ситуациясь кошаряй полафнемс предприятиять стратегиянц, сашендомс фкя мяльс партнерхнень мархта. Минь ушедоськ ни тя работать и карматама мольфтемонза сонь марса мархтонт. Предприятияса работай лама ломань, семьят и трудовой династият, и «Электровыпрямительть» руководстванц оцю путксоц сянди, што лама кизоста ашесть лоткафтов социальнай программатне, мольфтеви работа асу од ломаттнень мархта, ванфтфт научнай центратне. Тя ся базась, конань видеса ули кода латцемс од соткст и минь карматама тиендемонза тянь. Минь сааме фкя мяльс основной партнерхнень мархта, што кизоть аделавомс марса анокласаськ од ширетнень и мишендемань рынкатнень коряс од стратегическяй программать. Тя пяк важна республикати».
Мордовиянь Оцюнять аф лама пингс тевонзон тиендисна Артём Здунов, МР-нь Госсобраниять Председателец Владимир Чибиркин, МР-нь промышленностень, наукань и од технологиянь министрть тевонзон тиендисна Игорь Губайдуллин, «Электровыпрямитель» ПАО-ть генеральнай директороц Андрей Епишкин примасть участия предприятиянь инь цебярь работникнень каземасост.
«Электровыпрямительса» улемстонза Мордовиянь Оцюнять аф лама пингс тевонзон тиендисна ванозе производственнай цехнень еткста фкять, коса ноляви тяниень пингонь полупроводниковай продукция, тяконь лувксса изделият, конатнень лаца аш марнек мирса, конат нолявихть тевс эрь кодама отрасляса.
Стане жа предприятиса Артём Здунов етафтсь рабочай васедема Московскяй энергетическяй институтть ректоронц Николай Рогалевонь мархта и мольфтсь корхтама научно-производственнай сфераса марстонь работань вятемать колга. Тяконь лувксса корхтафоль Н.П.Огаревонь лемса МГУ-ть и Мордовиянь Технопаркть мархта сотрудничендамать квалма.
Мордовия Республикань Оцюнять пресс-службац