Мордовиянь Оцюнясь Артём Здунов 13 январьста ульсь Москуса Гайдаровскяй форумса. Республикань вятись корхтась «Научно-образовательный центр: надежда или головная боль региона» сессияса. Дискуссиянь участникокс арасть РФ-нь наукань и высшай образованиянь министрсь Валерий Фальков и региононь губернаторхне.
Лятфтасаськ, мировой уровенень научно-образовательнай центрань пуропнемать коряс программась ушедовсь 2019 кизоня странань Президентть Владимир Путинонь мяленц коряс. Тячи сон пуропни 35 регион, 150 вуз, 136 научнай организация и пцтай 300 индустриальнай партнёр.
Наукань и высшай образованиянь министрсь тяшкстазе: научно-образовательнай центратне — тя кувака пингонь проектт, тиемс теест результатт ули кода аф эстокиге, а мзярошка пингта меле.
Мордовиясь ащи «Инженерия будущего» научно-образовательнай центрань участникокс. Сон пуропнесыне 11 региононь инь оцю вуснень, научнай организациятнень и предприятиятнень. Минь республиканьке ули научно-образовательнай центрань 4 комитеттнень покодемасост: ёню агро, альтернативнай энергетика, медицинскяй технологиятне и од материалхне. Мордовиясь ащи вастокс, коса тиф «Ёню агро» комитетсь, тяза кармайхть пуропневома маштомошитне сембе региоттнень — кадрань, научно-исследовательскяй тевонь анокламать, тевс сувафнемаснон коряс НОЦ-ть участниконзон эзда.
Мордовиянь Оцюнясь азозе эсь мяленц сянь коряс, мезе арьсекшневи сатомс меколи научно-образовательнай центратнень тиемста. «Кда минь заняськ рынкать эсь продукцияньконь мархта, касфтоськ мишендематнень лувксснон, минь университетозонк кармасть сашендома НОЦ-ть ширенц коряс тонафнема студенттне — лисенди, минь сатоськ эсь целеньконь», - мярьгсь Артём Здунов.
Региоттнень ёткса марстонь тефнень вятемаснон коряс цебярь кепотьксокс арась «Наука и университет» национальнай проектть мяльса кирдезь Н.П.Огарёвонь лемса МГУ-ть видеса од ломанень лабораториять панжемац. Тяфтама лабораториянь тиемась лезды кемокстамс соткснень инь оцю научнай центратнень мархта и пуроптомс учёнайхнень маштомошиснон проектть эса путф задачатнень пяшкодеманкса.
Стане жа Мордовиянь Оцюнясь китькстазе: кда предприятиясь арси индустриальнай партнёркс университетти, эста вииякшнемань ширесь кочкаф лац, сяс мес производственникне сявондьсазь мяльс марстонь покодемать эзда сатневи ярмакть.
«Минь «Инженерия будущего» научно-образовательнай центрасонк пяк лама индустриальнай партнёрда, лисенди, што НОЦ-сь пяшкотькшнесы эсь тевонц», - мярьгсь Мордовиянь вятись.
«Инженерия будущего» НОЦ-ти стратегическяй индустриальнай партнёркс ащихть «Ростех» и «Роскосмос» Россиянь государственнай корпорациятне, а стане жа «РЖД»-сь. Тяда башка, НОЦ-ть партнёронзон улихть 50 странаста омба масторонь партнёрхнень мархта маштомошиса полафнемать коряс кеме соткссна.
Сессиять пингста корхтафоль 2030 кизоть самс научно-образовательнай центратнень виияфнемаснон колга.
Мордовия Республикань Оцюнять пресс-службац