Корхтафоль регионть социально-экономическяй виияфнемаса ветеранскяй организациятнень и республикань властень оргаттнень марстонь тевонь вятемаснон колга. Мордовиянь Оцюнясь отмечазе Консультативнай советть работанц оцю значениянц и спасибась ветераттненди республикать эряфса активнай участиянь примсеманкса, од ломаттнень патриотическяй воспитандамаснон эзда шири аф лядондоманкса. «Мялезе азомс теенть оцю спасиба — аньцек тинь вельдонт тейнек ули кода пачфнемс оттненди патриотизмань кизефкснень, - мярьгсь Артём Здунов. - Сяс мес тинь можете азондомс, кода сембось ульсь, кодама сталма мархта тинь васетькшнеде и кода эздост лисендеде».
Тячи оттнень ули вешфкссна оцюфнень, авторитетнай ломаттнень мархта корхнемаса. Республикань Оцюнясь азондсь Школьниконь российскяй движениянь активисттнень мархта аф кунардонь васедеманц колга, сембонди, кинь мялецоль ульсь кода максомс кизефкст региононь руководительти. Артём Здунов тердезень Консультативнай советонь члеттнень участвондамс школьникнень мархта тяфтама васедемаса. «Тя шабатне лият, синь ламода сяда оцюфт синь кизосост монь поколениязень коряс, - отмечазе республикань руководительсь. - Синь макссихть серьёзнай кизефкст — политическяйхть, и хозяйственнайхть. Лувондса, што сембе общественнай организациятнень задачасна — тиендемс семботь, штоба поколениясь, кона кармай молема мельганк, улель сембоса тейнек кеме нежекс, штоба афоль лисе ся зиянць, кона лиссь минь шабраньконь — синь нолдазь тя поколениять, ушедомок школать и семейнай воспитаниять эзда, синь макссть пря лиянь влиянияти».
Васедемаса корхтафоль историческяй мялямть, геройхнень колга мялямть ванфнемаснон колга. Тяконь лувксса корхтамась мольфтевсь тылонь героическяй труженникнень — Сурскяй рубежень строяйхнень колга мялямть ванфнеманц квалма. Мордовиянь Оцюнясь азондозе, што тя историческяй вастса Большеберезниковскяй районца ули строяф мемориальнай комплекс. «Тейнек эряви ванфтомс сембе пингс тя подвигть. Кда тянь аф тиемс, эста кафта поколенияда меле ломаттне аф кармайхть колганза мяляфтома. Тяниень пингть минь анокласаськ заявкать, проектно-сметнай документацияи мастер-план ули ни. Мяленьке тиемс солиднай мемориальнай комплекс музей мархта», - китькстазе Артём Здунов.
Мордовия Республикань ветеранонь советть и комитетть председательсна Иван Цыганок сембе ветеранскяй активть эзда спасибась Мордовиянь руководительти кунардонь тя кизефксть решандаманкса. «Минь од ломаненьке должетт содамс земляконьконь подвигснон колга, - мярьгсь сон. - Сурскяй рубежсь — тя республикань эряйхнень героизмаснон коряс цебярь пример. Минь сюконятама Тейть, тя работась эряви тиемс педа-пес. Минь ушедоме занцема пря тя проектть мархта 20 кизода тяда инголе, но аньцек мархтонт лисенттяма финишняй китьксти. Тя святой тев, тяконь лувксса кирдемок мяльса сянь, што мольхтяма Великай Победать 80 кизонцты». Васедемаса корхтафоль стане жа кизефкснень коряс, конат сотфт республикать экономиканц виияфнеманц мархта. Консультативнай советонь членць, «Оптикэнерго» ГК-ть директоронь Советонц председателец Эвир Боксимер спасибась Мордовиянь Оцюняти Саранскяень промзонаса и тяфта лемдеви Севернай тупикса кить строяманкса.
Консультативнай советонь членць, Саранск ошень ингольдень оцюнясь Иван Ненюков выступандась ошень хозяйствать работанц коряс предложения мархта. Стане жа корхтафоль СВО-ть ётафтоманц, мобилизованнайхнень и синь семьянь членцнон ширеснон кирдеманц колга. Тя темась тяни — васенце вастса сембонди, сон пуроптозень марс и бизнесть, и общественнай объединениятнень, и аф озадонь седихть ащекшни ломаттнень.
Консультативнай советонь членць, Мордовия Республикать эзга внутренняй тевонь ингольдень министрсь Петр Долгачев азондсь эсь опытонц колга (а сон ётазень Советскяй Союзонь сембе пси точкатнень), кода лезнемс военнослужащайхненди, мезть лангс шарфтомс башка оцю мяль.
Васедемась мольсь пцтай кафта частт. Шумордамстонза республикань Оцюнясь спасибась сембонди участиянкса, китькстазе, што Консультативнай советонь члеттнень опытсна пяк важнай тячиень руководительхненди. И тяни, мзярда коронавирусонь урмась потни, ветераттнень мархта васедематнень и консультациятнень ули кода ётафнемс сяда сиденяста.
Мордовия Республикань Оцюнять пресс-службац