Региононь вятись азозе, што коронавирусса сярядихнень лувкссна Мордовияса коль кири. Тя недялять фкя суткаста сярятькстыхнень лувкссна арась 100-да кржа ломань, тяка пингть «ковиднай» госпитальса пчксихть пцтай 400 сярядись. Стане жа кири амбулаторнай сярядихнень лувкссна.
Тяка пингть Артём Здунов шарфтсь мяль, што коронавирусть мархта ситуациясь аф сембе региоттнень эса полафни цебярь шири и кошардсь внимательнайста малаткшнемс ограничениянь лоткафтомаснон коряс решениянь примамати, сявондемок мяльс сянь, што семботи ули кода полафтомс. А эпидемиологическяй волнатнень ёткста пингть республикань Оцюнясь кошардсь нолдамс тевс вакцинациянь и диспансеризациянь ётафтоманкса. Региононь Минздравть инголе путф задача – курокста ушедомс тя работать сембе поликлиникатнень эса, нолдамс тевс райоттнень эса мобильнай медицинскяй комплекснень.
МР-нь Правительствать Председателенц заместителенц Галина Лотвановать валонзон коряс, недяляста сярядихнень лувкссна кирсь 443 ломаньда, сяда кржа арась и амбулаторнай сярядида. Ситуациясь полафтсь цебярь шири республикань сембе райоттнень эса. Ётай недялять «ковиднай» койка-васттнень лувкссна кирьфтафоль нинге 115-да, тячиень шити эздост лядсь аньцек 520, тяка пингть 20 процентсна – апак занякт. Галина Лотванова шарфтозе пчксемань учреждениятнень руководительснон мяльснон диспансеризациять коряс работать виияфнеманцты – планц коре тяфтама обследования эряви ётамс Мордовиянь 78 тёжяньда лама эряйти. Стане жа Правительствань зампредсь пачфтсь сянь колга, што региональнай оперштабть рабочай группанц заседаниянц пингста Мордовиянь главнай санитарнай врачсь азсь предложения лоткафтомс МР-ть территорияса весялгофни, культурнай, физкультурнай, спортивнай, выставочнай, просветительскяй, рекламнай и тятнень лаца лия мероприятиянь ётафтоманди ограничениятнень. Предложениясь примафоль, аноклавихть тянь коряс полафткст МР-нь Оцюнять Указонцты.
Мордовия Республикань Оцюнять пресс-службац