Сменась пуроптсь Мордовиянь 18 школьник, конат шарфнихть мяль космическяй сферати. Сонь арьсиец-смекаец Артём Здунов, а эряфс ётафтыец «Рузаевка-390» ёмла космическяй аппаратть арьсеманц и коряс Масторть орбитас нолдаманц коряс од ломанень научно-образовательнай проектть руководителец Дмитрий Пашков.
Лагерьса улемстост стирнятне-цёранятне эсь вийсост аноклазь сембе эрявикс установкатнень спутникть эзда сигналонь примаманкса. Оборудованиясь лезнесь теест практическяй занятиятнень пингста латцемс соткс низкоорбитальнай спутникнень мархта, конат работайхть 650 вайгяльбень сереса, а стане жа аппараттнень мархта, конат ащихть 36 тёжянь вайгяльбень сереса. Кочкаф сембе даннайхненди тиеви обработка сменать аделавомс.
Организаторхне китькстазь, што сменась лиссь эсь лацонне – щабатне ашесть ёта кочкама, сменас сявоманксост эрявсь аньцек мяльсна и космическяй темать мялень шарфнемасна. Мордовиянь Оцюнясь корхнесь школьникнень мархта, кизефнезень получаф маштомошитнень колга, примась участия радиолюбительскяй спутникть-ретрансляторть вельде радиосвязень сеанса.
Тяка пингть стирнятнень-цёранятнень ульсь аф кржа кизефкстост и эняльдемадост. Тяфта, синь сотфтольхть общественнай транспортса слежениянь датчикнень испытанияснон ётафтоманц мархта. Разработкать лангс мяль шарфтсь Инновациятнень ширеснон кирдемань Фондсь. Мордовиянь Оцюнясь кирдезе инициативать ширенц.
Земляконьконь, летчикть-космонавтть Владимир Дежуровонь шабатне кизефнезь, кодама качестват эрявихть сай пингонь космонавтти. «Главнайсь – шумбрашись и физическяй анокшись. Пуропнеда вийхть, тинь лама мяльдонт-арьсемадонт, тинь виде ки лангсотада!» - мярьгсь сон. Владимир Дежуров стане жа азсь мяль сявомс шабатнень, кинь мялец, Звёзднай ошкяв, коса теест улель кода няемс, кода мольфтеви космонавттнень анокламасна, кодама условияса синь эряйхть и ётнихть тонафнема. Тя мяльсь тусь аф аньцек школьникнень мяльс – сонь ширенц кирдезе и Артём Здунов.
Шабатне кизефнесть стане жа республикаса радиосвязень направлениять коряс сяда товолдонь тонафнемать колга.
Васедемати итогонь тиемста Мордовиянь Оцюнясь азозе: «Тя сменась кармай ётафневома фалу, карматама ётафнемонза сонь аф аньцек Мордовияса – эрявихть тиендемс выездной сменатка. Сембода главнайсь, што ули мяль, што шабатнень палыхть сельмосна. Минь, оцюфне, тяни ни макссетяма теест сяда лама кизефкста сянь коряс, мзяра макссихть синь. Сяс мес шабатне – содамошинь каннихть».
Артём Здуновонди и Владимир Дежуровонди сменань участникне казсть снимкат космическяй аппараттнень эзда, конат получафтольхть связень сеансть пингста.
Мордовия Республикань Оцюнять пресс-службац