Мордовиянь Правительствать составста Игорь Фрейдинонь туманц мархта региононь руководительсь ладязе МР-нь Правительствать лемста Саранск ошень округонь кураторкс вице-премьерть Батыр Эмеевонь. Тя лемса зампредсь ётафтсь ошень китнень коряс инспекция и сась аф цебярь лихтемати – Мордовиять столицасонза ётафтови лотконь петемать коряс работась ладяф пяк кальдявста.
«Петемась мольфтеви аф цебярьста и аф аделаф васта мархта. Подрядчиксь азондсы тянь кода технологиянь эсьлацонь ширекс. Азомс видеста, тяфтама технологият аш. Тянь лангс пеняцяйхть и эряйхне», - азозе Батыр Эмеев. Сон стане жа тяшкстазе, што маластонь пингть кармайхть тертьфт специалистт, конат максыхть питне профессиональнай ширде, тевс нолдаф технологиятненди, и сонь сатфксонзонды.
Саранскяень мэрсь азозе, што ётафтф работатнень локтонь петемать коряс подрядчикти нинге апак пантт.
«Тейнек эряви, штоба лац тиелезь китнень и эсь пингстост. Мон максан инголькиге вал, кда эсь пингстонза и лац аф тисасть работатнень, минь макссаськ тя тевть прокуратурав и сяда тов тя кизефксть аф кеподьсаськ. Лиссь пяк кальдявста! Цебярьста ётафтф работать вешсаськ и минь, и общественностсь», - китькстазе Артём Здунов. Тяда башка сон азозе, што маластонь пингть сонць ванцыне ётафтф работатнень ошень территориятнень ваномаснон пингста. Стане жа пуромксса Мордовиянь Оцюнясь азозе эсь мяленц сянь колга, што дорожно-транспортнай инфраструктурать стратегическяй ладяманц колга, китнень петемаснон и строямаснон кизефкснень коряс кярьмоди сонць республикань Правительствать Председателец Дмитрий Поздняков.
А цифровой касомать-виияфтомать и связть коряс кизефкснень, цифровой технологиятнень сувамаснон тяниень пингонь эряфс и синь эрявиксшиснон эряйхнень и территориять сетьмешиснон ладямаснон мельге кармай ванома МР-нь Правительствать Председателец Алексей Ежов.
«Структурнай и кадровай примаф арьсематне ладяфт, инголькиге, путф задачатнень тиемснон лангс, конань путозень инголенк странань Президентсь», - китькстазе Артём Здунов.
Мордовия Республикань Оцюнять пресс-службац