26 декабрьста, недляшиста, Атяшева аймаконь Батушева велеса панжезень кенкшензон социальнай од центрась, кона строяф «Велень территориятнень комплекснайста виияфнемасна» РФ-нь государственнай программать мяльса кирдезь. Панжемстонза ульсть Мордовиянь Оцюнясь Артём Здунов, РФ-нь Минсельхозонь велень территориятнень виифнемаснон коряс Департаментть директороц Ксения Шевелкина, РФ-нь Минсельхозонь отделть вятиец Виталий Платонов.
Атяшева аймаконь оцюнясь Виктор Прокин азозе, што од центрав ётасть социальнай и культурнай сферань организациятне, конат тяда инголе ульсть ташта зданияса. Тя фельдшерско-акушерскяй пунктсь, связень отделениясь, велень поселениянь администрациясь, кштимань и музыкальнай классне, музейсь. А вов 160 вастонди зрительнай зал эвондась Батушеваса васенцеда.
Тястонь машты кядь ломаттне анокласть инжихненди народнай маштомошинь выставка. Атяшевань аймакса занцихть пря шуфтста керсемаса, котф лангс сёрмадомаса и гончарнай искусстваса. Артём Здунов азсь мяль мастерхненди сяда эрьгавста тиендемс содафокс продукцияснон мишендемань электроннай площадкатнень эса. Тяфта кельгома тевти ули кода арамс покодемакс и каннемс аф кржа ярмак, вдь кядь вельдень производствати макссеви оцю питне.
Фкя залса пуроптфт Батушеваса шачф-касф художникть Виктор Вечкановонь работанза. Шиса улемстонза синь няфневсть омба масторса, а шачема -касома Мордовияса — вестевок аш. Мордовиянь Оцюнясь макссь поручения сай кизоня пуроптомс асу земляконц выставканц региононь музейхнень эса.
Республикань вятись мярьгсь, што велесь эряй и вииякшни, социальнай центрать коллективсонза лама од ломаньда. «Тинь центранте пяшкотьф эрьгада! Тейнек аш кода аф кирнемс тяфтама велетнень ширеснон, коса од ломаттне лядондыхть эряма и покодема. Россиянь Минсельхозть мархта минь сяда товга карматама виияфнемост велень территориятнень, стройсема и петнемост учреждениятнень, штоба эряфсь тяса улель аф сяда кальдяв ошеннеть коряс. Тя ся случайсь, мзярда тевс нолдаф ярмакне макссть пяк цебярь результат», - китькстазе Артём Здунов.
Велень территориятнень виияфнемаснон коряс Департаментть директороц сюконясь строительхненди цебярьста пяшкотьф тевонкса. «Ломаттнень сельмоснон коряс няеви, конашкава эрявсь тяса социальнай центрась. Мялезе сюконямс райононь администрацияти объектть творческяй ширде козякофтоманкса. Тяни тя пример сянди, кода фкя площадкаса можна получамс мзярошка услуга медицинскяйхнень эзда сявомок творческяйхненди молемс», - мярьгсь Ксения Шевелкина.
Аймаконь творческяй коллектифне анокласть инжихненди мялень салай концерт.
Мордовия Республикань Оцюнять пресс-службац