Артём Здунов 26 октябрьста Москуса РФ-нь Президентть видеса Мордовия Республикать Постояннай представительствасонза васетькшнесь «Монь Мордовиязе» кадровай проектонь аноклайхнень-ётафтыхнень мархта. Региононь вятись макссь оцю питне конкурсть смузенцты и сюконясь аноклаензонды-ётафтыензонды цебярь покодеманкса, кона мольфтевсь аф фкя ков, китькстазе, што марстонь вийса удалась пуроптомс цебярь кадровай резерва сятнень лувксста, кие анок покодемс шачема-касома республикать панчфокс панжеманкса.
«Монь Мордовиязе» конкурсонь сяськихне – тя пяк цебярь кадрат, конат анокт покодемс. Мон сюконян проектонь аноклайхненди-ётафтыхненди маштозь тевснон тиеманкса. Улель пара сяда товга кирдемс мархтонт партнёронь соткст, ётафнемс эряфс марстонь проектт!», - мярьгсь Артём Алексеевич.
Лятфтасаськ, «Монь Мордовиязе» кадровай проектсь, кона ётафтовсь «Россия – страна возможностей» АНО-ть ширень кирдеманц пингста, ушетфоль тяддень март ковста и шумордавсь июнть кучкаста. Кадровай проектонь участникокс арасть 6 тёжяньда лама ломанць, 40-ць ёткстост лиссть сяськикс.
Сяськихне и финалисттне сувафтовсть управленческяй кадрань региональнай резервати, синь тертьфтольхть покодема аф фкя лацонь уровенень властень исполнительнай оргаттненди. Тячиень шити покодема вастт максфт проектонь вейхкса участникти:
Алексей Ларькин, кона тяда инголе ульсь Московскяй областень Вирень хозяйствань комитетонь вирень ванфтомань отделти оцюнякс, арафтф Мордовия Республикань вирень, охотничьяй хозяйствань и природопользованиянь министркс.
Наталья Санина, кона покодсь Мордовия Республикань Информатизациянь и связень министерствань информационнай обществань и электроннай правительствань программань и проектонь отделонь оцюнякс, занязе МР-нь информатизациянь и связень министрти васенце полафтыень вастть – цифровой развитиянь управлениянь оцюня.
Антон Назаров, кона покодсь «Корпорация развития Республики Мордовия» ООО правовой департаментонь консультантокс, арафтф МР-нь юстициянь министрти полафтыкс.
Александр Анохин, тяда инголе покодсь Нижегордскяй областень УФПС-нь «Почта России» АО-са, ульсь директорти полафтыкс. Тяни занцесы МР-нь экономикань, торговлянь и предпринимательствань министрть полафтыенц вастонц.
Александр Долганов, Н.П.Огарёвонь лемса МГУ-нь аф органическяй и аналитическяй кафедрань оцюнясь, ушедсь вятемонза «Инженерия будущего» научно-образовательнай центрать региональнай представительстванц.
Людмила Трошкина, тяда инголе вятезе «Оримэкс» ООО-нь мишендемань отделть, арафтф «Центр развития конкурентоспособности Республики Мордовия» АНО-нь директорти советникокс.
Михаил Никишин, ульсь МР-нь Оцюняти старшай помощникокс, тяни арафтф Мордовия Республикань Оцюнять Секретариатонцты вятикс.
Анастасия Гришнева арафтф МР-нь спортонь и од ломанень политикань министрти васенце полафтыкс - од ломаттнень тевснон коряс Управленияти оцюнякс. Тяда инголе покодсь Н.П.Огарёвонь лемса МГУ-са проектнай маштомошинь виияфнемань центрань директоркс.
Виктор Степанцов арафтф МР-нь Оцюняти старшай советникокс, тяда инголе ульсь «Казань-интур» компанияти директоркс.
Сяськихненди ули кода тонафнемс «Развитие управленческих навыков руководителя» программас коре, кона кармай ащема мастер-класста. Синь няфтьсазь-вятьсазь «Губернаторонь федеральнай школань» тонафтыхне.
Тяда башка, финалонь участникне сувафтовсть «Монь Мордовиязе» эксперт най клубти, конанди оцюнякс ащи региононь вятись Артём Здунов.
Республикань Оцюнясь азозе: маластонь пингть тиевихть од назначеният кадровай конкурсонь участникнень лувксста.
Мордовия Республикань Оцюнять пресс-службац