Мордовиянь Оцюнясь Артём Здунов 24 ноябрьста ульсь «Медоборудование» заводса. Республикань вятись ванозе предприятиять, корхнесь вятиензон мархта производственнай платтнень колга, а стане жа поздравляндазе трудовой коллективть заводть 60 кизонь топодеманц мархта.
Медицинскяй оборудования, стационарнай и подвижной медицинскяй техника, дезинфекционно-душевой установкат и автоперевязочнайхть, стерилизаторхт, парогенераторхт и аквадистилляторхт – сембось тя ноляви Саранскяень предприятияса. 2020 кизоня пандемиять каршес тюремать мяльса кирдезь заводса арьсефтольхть и аноклафтольхть ковиднай госпитальхнень лятксснон машфтоманкса блокт-контейнерхт, транспортти обработкань тиеманкса санпропускник, Саранск ошень больницятнень муськомань машинкаснон ладяманкса блокт-контейнерхт.
Кой-кона продукциять коряс «Медоборудование» заводсь странаса фкя и сяка производительсь. Предприятиять прянь шнафтома вастонза – автоперевязочнай установкась и мекольдень поколениянь передвижной реанимационнай комплекссь, кона лама пинге покотьфтеви больницять эзда ширеса.
Артём Здунов васетькшнесь предприятиянь коллективть мархта, поздравляндазень заводть 60 кизонь топодеманц мархта и сюконясь цебярьста покодеманкса. Предприятияса улихть трудовой династият, ламотне покодихть тяса аф фкя кемонь киза. Тя, кепотьксонди, водительсь Борис Мешков – сонь трудовой стажец 51 киза, токарсь Михаил Макаров – заводса трудендай пцтай 25 киза.
Республикань Оцюнясь арьсесь предприятияти касфнемс ноляви продукциять лувксонц, ванфнемс кадратнень и китькстазе, што республикась кармай кирнемонза заводть ширенц. «Ламоц тифксонтень мархта мон содафтонь тяда ингольдень покодема вастонень эса лия регионца. Панда мархта васттнень эса, кепотьксонди, оцю вешфкссь продукциянтенди – ули кода эстокиге ладямс передвижной комплекс. Предприятиять ули гособоронзаказоц, и тя корхтай сянь колга, што производствась оцю технологиянь. Тядде передприятиясь аф кальдявста няфнесы прянц рынкаса – вейхкса ковста кафтонь-крда кассть мишендеви продукциять объёмонза. Карматама старандама сяда товга касфнемс производствать, тинь трудонте эряви ломаттненди», - мярьгсь Артём Алексеевич.
Промышленностень, наукань и од технологиянь министрсь азозе: шумордама лангса машиностроительнай кластерть пуроптомац - тя панжи предприятиять инголе ки ширень кирдемань од мератненди. «Минь задачаньке – лездомс предприятияти аськолямс инголи, одкстопнемс производствать, водендакшнемс од закаст и аноклакшнемс инновационнай продукция», - мярьгсь Игорь Губайдуллин.
Предприятиянь коллективть поздравляндазь Мордовиянь Госсобраниять Оцюняц Владимир Чибиркин и «Медоборудование» АО-ть директоронь советонц оцюняц Евгений Михайлов.
Мордовия Республикань Оцюнять пресс-службац