Артём Здунов: «Минь юмафнетяма лама ломань пожархнень пингста – нолямс тянь аш кода!»

Артём Здунов: «Минь юмафнетяма лама ломань пожархнень пингста – нолямс тянь аш кода!»

23 октябрьста Мордовиянь Оцюнять ширеса эрь недялянь оперативнай совещанияса корхтамась мольфтевсь пожархнень инголямаснон колга, конатнень пингста шавондови аф кржа ломань.

«Статистикась мяль аф кепси, и, ужяленди, кизоста кизос аф цебярьготкшни, - азозе Артём Здунов. – Сяс эряви виияфтомс покодемать велетнень-ошнень эса пожаронь пельксть кирьфтаманкса».

МР-ть эзга Россиянь МЧС-нь Главнай управлениять даннаензон коряс, пожархненди фкя инь васенце туфталхне – тя пожарнай безопасностень вешфкснень аф пяшкотькшнемасна, электрооборудованиять синневомац, газовай оборудованиять, пянакуттнень тевс нолямань вешфксснон колсемасна. Анализсь, кона тифоль пожархнень коряс мекольдень вете кизотнень, няфнесы, што сексень-тялонь пингть саманц мархта пожархнень лувкссна касонды 70 процентта.

Тяниень пингть пелькс ули республикань 22 эряфкшу ломанти, а стане жа населениять социальнай ширде аф аралаф пяльксонцты. Мордовиянь Оцюнясь мярьгсь сявомс синь башка контроль алу. Эряви якамс куттнень эзга, ванондомс, коса улихть афсатыкст газовай оборудованиять, пянакуттнень мархта, эсь пингстонза машфнемс синь.

«Эряви кафта недяляста пяшкодемс тя тефнень, ваномс сембе ня домохозяйстватнень, - мярьгсь Артём Алексеевич. – Эняльдян маладомс тянди пяк ответственнайста, сяс мес тялось маласа ни, уштомань пингсь ушетф. Эряфкшу ломаттне, бабатне и атятне, конатненди сирексшиснон сюнеда аф обеспечендави отопительнай системаснон техническяй анокшиц, сявомат башка контроль алу, водендакшнемс тянди волонтерхнень. Тейнек эряви араламс ломаттнень!»

Мордовия Республикань Оцюнять пресс-службац