1 октябрьста Мордовия Республикань Оцюнясь Артём Здунов примась участия ПФО-нь музейхнень лангс мялень шарфтомать касфнеманц коряс пуромксса, кона ётась «Россиянь музейнай маршруттне» проектть мяльса кирдезь. Туриндустриянь и музейнай сообществань представительхнень мархта корхтафоль региоттнень брендснон анокламаснон-пуроптомаснон и внутренняй туризмать виияфнеманц колга.
Артём Здунов азозе: Саранскяйсь сувась 10 региоттнень лувксс, конат ётафтсазь эряфс «Россиянь музейнай маршруттне» проектть. Тя оцю честь регионти. «Тяниень пингть мольфтеви афкуксонь тюрема од ломаттнень ёньцнон и мялень шарфтомаснон инкса. Культурань учреждениятне эрьгавста поладсть тя покодемати. Краеведческяйда башка миньцонк улихть, кепотьксонди, шуфтонь налхкшень или валенцянь музейхть. Интернетса келиста содафокс синь тиендемасна лезды касфтомс мишендемаснон. Минь задачаньке – пуроптомс сембонь синь фкя туристическяй маршрутс», - мярьгсь Мордовиянь Оцюнясь.
Музеень и РФ-нь Культурань министерствань внешняй связень Департаментть директороц Наталия Чечель азозе: туристтнень вешфкссна мекольдень пингть няевиста кассть, но Мордовиясь тянь ширде лядонды мялень шарфты регионкс. «Тяса пяк цебярь инфраструктурась: улихть гостиницат и общепитонь цебярь сеть. Тяда башка, туристть ули мялец сявомс мархтонза лятфнембяленди аф магнитик холодильник лангс, а мезе-мезе мялень салай и полезнай. Народнай промыслатне республикаса няфтьфт келиста. Ули кода азомс, што тинь ащетяда лидеркс креативнай индустрияса», - азозе Наталия Чечель.
Пуромксонь участникне мольфтсть корхтама сянь колга, кода шарфтомс туристтнень мяльснон. Тяда башка, кепотьфоль брендовай туристическяй маршруттненди региональнай, муниципальнай и частнай музейхнень сувафтомаснон мархта сотф кизефкссь.
Мордовия Республикань Оцюнять пресс-службац