«Мордовиянь педагогне – а тя 15 тёжянь ломатть – маряй седихть, асуфт, результат лангс покоди ломатть. Минь васьфнетяма мархтонтт эрь шиня, аф пельхтяма максомс теентть эсь иднеконь. Тейнек принципиальна важна, штоба минь улелеме инь цебярькс республикаса, странаса», - китькстазе регионтть руководителец.
Регионтть Оцюняц китькстазе, што Мордовиянь педагогне фалу кирдьсазь профессиональнай содамашинь оцю планкать, няфнихть цебярь результатт эрь кодама уровенень сяськомаса. Мордовиясь кода и фалу сувси образованиянь качествать коряс лидеронь тройкать етксстратегическяй инициативань Агенствать рейтингса, занци цебярь вастт «Эффективность системы выявления, поддержки и развития способностей и талантов у детей и молодежи» показательть коряс. Учительхнень содамашисна и эсь прянь аф ужяльди покодемасна лезды ученикненди сатнемс оцю сатфкст предметнай олимпиадаса – Мордовиясь участиянь результативность коряс кемонь лидерхнень ёткса.
«Илафтса республикать тяфтама цебярь кизонь результаттнень мархта!» - мярьгсь Артём Здунов.
Ульсь китькстаф, што государствась эсь ширденза покоди учительскяй профессиять социальнай статусонц касфтоманц лангса – Россиянь Президентть решениянц коряс тя кизоть касфтфт класснай руководительхненди и идень касфтомать коряс директоронь советникненди федеральнай выплататне. Полатф «Земский учитель» программась. Республикаса пяшксе объемса ванфтф сембе кирдемань региональнай мератне,синь кармайхть касондома.
Оцю покодема регионца ётафневи и образовательнай инфраструктурать одкстопфтомаса – панчсевихть од школат, мольфтеви капремонт федеральнай программать коряс, учреждениятне пяшкотькшневихть тяниень пингонь оборудованияса. Сембе велень школатнень эса улихть «Точка роста» Центрат, тиендевихть школьнай «Кванториумпт», средняй профессиональнай образованиянь кластерхт. Регионть руководителец китькстазе: республикась кармай эрязста модернизировандамост образовательнай учреждениятнень – педа пес петемс идень садтнень и техникупнень, одкстопнемс идень лагерень базатнень, пяшкотькшнемс предметнай кабинеттнень школава.
«Тячи прявкссь – тиемс стане, штоба касы поколениясь кельголезень и ванфтолезень минь духовна-нравственнай питнишиньконь. Минь иднеконь еньснон и ваймоснон инкса моли оцю идеалогическяй тюрема. Идь пингста сембось няеви аф стане кода ули, а объективна питне макссеви сяда меле. Сянкса тейнек важна васенцексс пачкодемс стирнятненди и церанетненди эрявикс информациять мархта – штоба афоль уль полафтф историясь,эряви азонкшнемс сянь колга, кода тяни воявайхть минь боецоньке, мезе тиеви масторлангса, мезе ульсь историяса, и кода тя повторяндави. Шарфнеда мяль «Важнайть колга корхнематнень» лангс, а тяни нят урокне кармайхть ётнема и идень садтнень эзга, - китькстазе Мордовиянь Оцюнясь. – Седи ваксста илафттядязь сембонь тонафтыень Шить мархта. Катк кенярдемась, конань тинь казеньдьсасьть идтненди и тядятненди-алятненди, сашенды теентть меки сядонь кърда!»
Мордовиянь Правительствать Председателенц васенце полафтыец Галина Лотванова пшкядсь республикань педагогненди: «Сюкпря, тонафтыхть, профессияти верностенкса, идтненди пефтома кельгоманкса! Катк тинь учениконтте фалу тинь кенярьфнетядязь!»
Торжественнай мероприятиять пингста ульсть казьфт оцю наградат.
Советскяй Союзонь Геройть В.Б. Мироновонь лемса № 20 гимназиять директороц Ринад Аюпов, кона казьфоль III степенень Мордовия Республикань Славань орденца, китькстазе: «Учительти уважениясь, кельгомась – тя кеме и вии Россиянь гарантиясь!»
«Кенярдян покодемс кельгома Мордовиять и Россиять пара эряфс!» - мярьгсь асу идтнень лемс Республиканскяй лицейть директороц Евгений Вдовин, конанцты максф «Заслуженный работник образования Республики Мордовия» почетнай звания.
Мордовиянь образованиянь министрсь Елена Солдатова китькстазе: «Тинь тиендьсасьть вандыень шить, кельгома коллегат. Минь профессияньке инь эрявиксс, семьять мархта марс минь шиста шис касфттама од поколеният. Уледа гордайхть, ёнюфт и терпеливайхть! Тейнек сяввихть эрь кодама сатфксне!»
Сембероссиянь пялькстомаса педагогненди-сяськихненди ульсть казьфт Россиянь Президентть премияц, а инь цебярь воспитательхненди, школьнай учительхненди и преподавательхненди – Мордовия Республикань Оцюнять премияц.
Мордовия Республикань Оцюнять пресс-службац