Мордовиянь Оцюнять аф лама пингс тевонзон тиендисна Артём Здунов 20 апрельста етафтсь рабочай васедема Нижняй Новгородса РФ-са Беларусь Республикань Посольствать отделениянц вятиенц Владимир Воронковичень мархта. Корхтамась мольфтевсь сотрудничендамать кемокснеманц, торгово-экономическяй и гуманитарнай сфераса марстонь работать коряс од ширень ладямать колга.
Мордовиянь Оцюнять аф лама пингс тевонзон тиендисна отмечазе кафта ширдень соткснень оцю значенияснон. Лятфтасаськ, што Мордовия Республикань Правительствать и Беларусь Республикань Правительствать еткса кемокстаф торгово-экономическяй, научно-техническяй и культурнай сотрудничендамать колга соглашения.
Тяниень пингть Белорусь Республикать мархта торгово-экономическяй соткснень ширеснон кирнесазь республикань 60 лама предприятиясь. Внешнеторговай оборотсь 2020 кизонкса арась 44,8 миллион США-нь доллар. Белорусь Республикав экспортонь основной товаркс ащихть: подвижной составсь и сонь пяльксонза, кабельно-проводниковай продукциясь, светотехническяй товархне, полупроводниковай приборхне, алюминийсь и эздонза тиф изделиятне, пластмасась, резинотехническяй продукциясь и стак тов. Республикав ширдест пачфневихть оборудования и механическяй устройстват.
Саранскяень общественнай транспортонь парксь футболть коряс миронь чемпионатонь карша одкстоптфоль Минскяй автомобильнай заводонь автобуснень вельде. Тракторхнень 60 процентсна, конат улихть регионть АПК-са, - тя белорусскяй техника.
Тяка пингть Мордовиянь Оцюнять аф лама пингс тевонзон тиендисна китькстазе регионть территорияса белорусскяй производствань техникать обслуживаниянц коряс Центрать панжеманц значениянц. «Республикасонк ули вии дилерскяй центра. Сяс минь эняльттяма арьсемс миньцонк диагностическяй и ремонтнай сервисонь панжемань возможностть колга. Кда тяфтама центра эвондай, теенза фалу кармай работа. Тя кармай удобна минь велень производителеньконди», - мярьгсь Артём Здунов.
Нижняй Новгородса РФ-са Беларусь Республикань Посольствать отделениянц вятиец кирдезе марстонь работань од ширетнень панжемаснон ширенц, сявондемок мяльс сянь, што пандемиянь условияса кирсь марстонь деловой активностсь, мезть эзда ащи территориятнень еткса товарооборотть объемонза. «Тя кизонь кафта ковста товарооборотсь арась аньцек 46 процент мелянь уровенть коряс, - азозе Владимир Воронкович. – Шарьхкотькшнеса, што эрятама пандемиянь стака условияса, мзярда аш очнай контактт и переговорхт. Сяс тейнек марстонь вийса эряви петемс тянь».
Мордовиянь оцюнять аф лама пингс тевонзон тиендисна китькстазе, што республикать ули интересоц инвестиционнай и торгово-экономическяй сотрудничендамать сяда товолдонь виияфнемаса и сон панжада белорусскяй партнерхнень мархта марстонь работати.
Мордовия Республикань Оцюнять пресс-службац